34 bloke isinuko, 6 itinago | MANGINGISDA, ARESTADO SA COCAINE

TIKLO ang mangingisda dahil sa pag-iingat ng anim na bloke ng cocaine na narekober nito sa karagatang sakop ng Tandag City, Surigao del Sur.

Sa presinto na napag-alaman na hindi lang itinago ng suspek ang kontrabando kundi ibinibenta rin.

Kinilala nag suspek na si Ronie Arpilleda, 48, mangingisda.

Ayon kay Police Regional Office-13 (PRO13) Director Police Brigadier General Gilberto DC Cruz, una umanong isinuko ni Arpilleda sa pulisya noong Pebrero ang 34 blokeng cocaine na natagpuan sa Tandag City ngunit, itinago umano nito ang 6 bloke para ibenta sa drug user.

Pinasalamatan pa ng PNP si Arpilleda at itinuring na samaritano pero, nakatunog umano ang pulisya na may 6 bloke pa itong naitabi upang mapagkakitaan.

Nang maramdaman ng mangingisda na sinusubaybayan siya, isinuko nito ang 4 bloke habang itinapon niya umano ang 2 sa inodoro.

Nakatakdang kasuhan ng paglabag sa Comprehensive Dangerous Drugs Act si Arpilleda dahil sa pag-iingat at pagbebenta ng cocaine.

Nagbabala naman si Cruz sa mga hindi magbabalik ng mga bloke sa mga awtoridad.