BIADO, CHUA, FARAON AT IGNACIO SA WPA

DALAWANG malala­king billiards tournament sa buong mundo ang sasargo na at inaasahang mabubu­labog ang mga nakaupo sa top 20 ng world rankings si­mula ngayong Abril 12, Biyernes, sa Las Vegas.

Una rito ang pinaka­unang edisyon ng World Pool Billiard Association (WPA) Players Champion­ship na gaganapin sa pala­ruan ng Griff’s Billiards mula Abril 12 hanggang 21 habang ang makasaysayang U.S. International 9-Ball Open ay masasaksihan sa Mandalay Bay Resort & Ca­sino simula Abril 21 hang­gang 26, 2019.

Nakasalalay sa mga ba­likat nina Carlo “The Black Tiger” Biado, Johann Chua, Raymond Faraon at Jeffrey Ignacio ang pagpa­pakinang ng tatlong kulay ng Pilipinas sa malupit na pagtitipon ng mga disipulo ng 9-ball.

Sina Biado, pangatlo sa pinakamalupit na bilyarista sa buong mundo at Chua, two-time All Japan cham­pion ay pasok na sa main event habang sina Faraon at Ignacio ay nakasalang pa sa qualifying rounds ng palig­sa­hang magkakaloob ng kabuuang $50,000 sa mga kalahok na mapapabilang sa winners’ circle.

Isa pang pinangingila­gang Pinoy, si Alex “The Lion” Pagulayan, ang kalahok din sa torneo. Ang tubong Isabela at dating world 9-ball king na nakabase na ngayon sa Canada ay may maangas na rekord dahil sa napagwa­giang apat na korona at isang podium finish sa iba’t-ibang sagupaan ngayong 2019. Pang-apat na rin siya sa ka­sa­lukuyang AZBilliards moneyboard.

Matinding harang sa kam­panya ng mga Pinoy ang mga de-kalibreng ma­nu­numbok mula sa iba’t-ibang parte ng mundo tulad nina Alexander Kazakis (Greece), Niels Feijen (Ne­therlands), Chang Jung-lin (Taiwan), Ko Pin-yi (Tai­wan), Shane Van Boening (USA), Fedor Gorst (Rus­sia), Jayson Shaw (Scot­land), Chris Melling (Eng­land), Denis Grabe (Esto­nia), Thorsten Hohmann (Germany), Naoyuki Oi (Japan), Eklent Kaci (Al­bania), Mika “Iceman” Im­monen (Finland) at Ralf “Kai­ser” Souquet (Ger­many).

Sa kabilang dako, ang US Open ay magkakaloob ng winners’ cash pot na $300,000. Ang paligsahan ay gaganapin na sa pang-43 na pagkakataon.