Mismong mga residente ang makapagsasabi kung gaano kalala ang iligal na droga sa kanilang lugar, per

KA AMBO / BISTADO

DUMIPENSA si Mayor “Lenlen” Oreta ng Malabon City sa banat ni P-Digong na sangkot sa illegal drugs ang kanyang siyudad.

Inilabas sa media na kinilala ng DILG ang performance nila sa anti-drug campaign noong 2018!

◘◘◘

UMABOT na raw sa 40 percent ng barangay ang drug-free sa Malabon.

Pero, pumapalag ang mismong mga residente sa katotohanan ng ulat.

Ano ba ‘yan?

◘◘◘

TINUKOY na drug-free ang siyam na barangays na Baritan, Dampalit, Ibaba, Muzon, Niugan, San Agustin, Concepcion, Flores at Panghulo.

Pero, paano naman ang ibang barangay na talamak ang illegal drugs?

◘◘◘

BATAY sa records, ang dating barangay captain na si alyas Alvin ay kabilang sa PDEA narco-list.

Siya ang itinuturong utak ng shabu lab na pag-aari ng Chinese na si Jiang Minshan na katabi mismo ng barangay hall sa Tenajeros!

◘◘◘

PASOK din sa PDEA narco-list ang kapitan ng Bgy. Hulong na isang alyas Anthony.

Dapat maisuko agad ni Meyor “Lenlen” ang naturang kapitan upang makaiskor siya sa batikos ni P-Digong!

◘◘◘

NAKUMPISKAHAN naman ng 4 sachets ng shabu ang 3 barangay tanod ng Bgy. Longos na nagka­kahalagang P100,000.

Paano makakalmante ang mga residente kung ang tanod ang siyang tulak at adik?

◘◘◘

SINALAKAY din ng mga awtori­dad ang drug warehouse sa Bgy. Santulan na konektado sa notoryus na Dragon Wu International Syndicate sa Asya.

Pinasok na rin ng international mafia ang Malabon!

◘◘◘

ANG masakit, nag-viral sa social media ang tatlong bagets sa Bgy. Tugatog na minumura si P-Digong.

Maaaring nasa impluwensiya sila ng iligal na droga kaya nagawa ang pambabastos sa pangulo!

◘◘◘

Noong nakaraang Huwebes ay naaresto ang isang pulis-Malabon kasama ang kanyang ama at tiyahin sa drug bust operation sa Quezon City.

Hindi lang simpleng tanod at pulis kundi pami-pamilya na ang nalululong sa iligal na droga!

◘◘◘

PINABUBULAANAN ng mayor ng Malabon ang akusasyon ni P-Di­gong pero, paano na ang aktuwal na nagaganap sa kanyang paligid?

May intel info si P-Digong at hindi basta-basta ito mag-aakusa!

Ang mismong mga residente ang nakaaalam kung gaano kagrabe ang illegal drugs sa naturang siyudad!

◘◘◘

MABUBURA ba ng award ng DILG ang illegal drugs?

Ang sagot ay malinaw na hindi!

◘◘◘

HINDI magiging talamak ang illegal drugs nang walang natatanggap na proteksiyon sa mga may hawak ng kapangyarihan.

‘Yan ang tunay na ugat ng kanser sa ating lipunan!