SCORPIONS AT MCDAVID, DINOMINA ANG D-LEAGUE
GAYA ng inaasahan, dinomina ng Centro Escolar University ang CD14 Designs-Trinity University of Asia, 93-69, para sa ikalimang sunod nilang panalo kahapon sa 2019 PBA D-League sa JCSGO Gym sa Cubao.
Muling pinangunahan ni Senegalese big man Maodo Malick Diouf ang Scorpions sa itinala nitong 27 puntos, 18 rebounds, at 4 blocks. Nakabalikat niya ang locals na sina Jan Formento na nagtala ng 17 puntos, Judel Fuentes at Pierce Chan na nag-ambag ng tig-13 puntos. “I was worried about my team because (CD14 Designs-Trinity was) winless and my team might just take them for granted,” wika ni CEU coach Derrick Pumaren. ‘That’s what I’ve been harping on them, they’re 0-4 and if they’re gonna get their first win, they have to get it on the other teams.”
Dahil dito, tumatag ang CEU sa pangingibabaw sa Foundation Group sa hawak nilang malinis na markang 5-0, panalo-talo.
Pinangunahan nina John Tayongtong at Gab Reyes ang winless pa ring White Stallions sa itinala nilang tig- 11 puntos.
Samantala sa huling laro, nakatikim na rin ng panalo sa wakas ang McDavid matapos ungusan ang Family Mart-Enderun College, 73-68. Nagtala si Michole Sorela ng 22 puntos, 4 rebounds at 2 assists upang tumapos na topscorer para sa McDavid.
Pero ang ex-pro na si Jerwin Gaco ang sumagip sa koponan nang mawala nito ang naunang 63-44 na bentahe sa paghabol ng Titans.
Tumapos si Gaco na may double-double 10 puntos at 14 rebounds para tulungan ang McDavid na putulin ang nauna nilang 4-game losing slide at umangat sa markang 1-4 sa Aspirants Group. (VA)
Comments