Babala sa madalas mamaga ang mga kasukasuan!

SHANE M. LUDOVICE, M.D / SABI NI DOC

Dear Doc. Shane,

Nang mag-edad 60 ang aking nanay ay na­pansin kong hirap na siyang lumakad at ma­dalas mamaga ang kan­yang mga tuhod na may kasamang pamumula. Ang sabi ng tiyahin ko ay gout daw ito. Totoo ba ito, paano ba malalaman kung ito ay gout o arthritis, gayundin, mayroon ba siyang maaaring inumin? — Cady

Sagot

Ang gout ay isang uri ng sakit kung saan namamaga ang kasukasuan. Karaniwan ay nakaaapekto ito sa hinlalaki ng mga paa at sa iba pang kasuka­suan sa mga kamay at tuhod. Kilala rin ito bilang gouty arthritis. Dahil isa ito sa pinakamasakit na uri ng pamamaga, kadalasan sa mga taong nakararanas ng gout attack ay umiinom agad ng pain reliever o gamot na inireseta ng doktor.

May posibilidad na magka-gout attack ang tao kapag nakaranas ng matin­ding sakit sa bahagi ng buto sa kasukasuan at nahihi­rapang igalaw ang bahaging ito.

Narito ang iba pang sintomas ng gout:

• Pamumula, pananakit at pamamaga ng kasukasuan

• Pagkati ng kasukasuan

• Matinding sakit sa apektadong bahagi ng katawan

Ang pangunahing sanhi ng gout ay ang pagkakaroon ng sobrang taas na antas ng uric acid. Kapag hindi naipalalabas ng mga bato, maiipon ang uric acid sa dugo at bumubuo ng kidney stones. Bagama’t, hindi lahat ng taong may mataas na antas ng uric acid ay nagkakaroon ng gout attack, maaari pa ring maranasan ang mga sinto­mas nito.

Mas mataas ang posibili­dad na magkakaroon ng gout attack kung isa sa mga miyembro ng pamilya ay may gout o nagkaroon na rin ng gout attack.

Bukod dito, maaari ring madagdagan ang chance na magkaroon ng gout kapag may mataas na uric acid level (hyperuricemia).

Mahirap malaman kung may gout ang tao dahil ang mga sintomas nito ay masya­dong karaniwan ngunit, maraming mga naibalitang lumala lamang ang kanilang nararamdaman bunga ng self-medication at pag-inom ng maling mga gamot.

Bagama’t, indikasyon ng pagkakaroon ng gout ang pamumula, pananakit at pamamaga ng kasukasuan, hindi masisiguro ang karam­daman dahil lang sa mga sin­to­mas na ito. Kung magpa­pakonsulta sa eksperto sa kasukasuan, mas magiging sigurado sa pagtukoy ng karamdaman. Praktikal ang pagpapa-check-up upang malaman kung gout ba ang kondisyon o mas malala pa.

Narito ang ilang mga pagsusuri upang malaman kung mayroong gout ang indibidwal:

• Blood testing

• Joint fluid test

• X-ray

Ang punto ng maagang paglunas sa gout ay ang pag-iwas sa pananakit ng kasu­kasuan. Kadalasan, bubuti ang karamdaman nang ilang araw o oras lamang pagka­tapos itong gamutin. Kapag nakaranas pa rin ng gout attack, gawing prayoridad ang paghahanap ng permanen­teng lunas sa kondisyon upang hindi ito maging sanhi ng kumplikasyon o ang pagka­sira ng kasukasuan.

Narito ang iba’t ibang paraan upang magamot ang gout:

• Maglagay ng icepack sa itaas ng naapektuhang kasu­kasuan upang mahimas­ma­san ang pananakit at pamamaga.

• Iwasan munang gamitin o igalaw ang naapektuhang kasukasuan.

• Uminom ng pain relief medication upang malunasan ang pananakit.

• Uminom ng mga anti-gout medication tulad ng anti-inflammatory drugs at corticocol­steroids upang malunasan ang pananakit at pamamaga.