BEERMEN, NILASHENG ANG KATROPA SA GAME 1 Q’FINALS
NAPALABAN ng todo ang San Miguel Beer bago nakuha ang 80-78 panalo kontra sa TNT KaTropa sa Game 1 ng kanilang best-of-three quarterfinals sa PBA Philippine Cup kahapon sa Mall of Asia Arena, Pasay City.
Humugot ng lakas ang Beermen sa second half upang itakas ang panalo at mamuro sa pagsampa sa susunod na phase.
Tumikada sina five-time Most Valuable Player, (MVP) June Mar Fajardo, Marcio Lassiter at Terrence Romeo ng tig 15 markers para sa Beermen. Nagbalak kumawala ang KaTropa sa first quarter matapos hawakan ang 9-point lead, 22-13.
Subalit hindi nagpaiwan ang Beermen, natapyasan nila sa pito ang hinahabol, 39-46, sa halftime.
Unti-unting humahabol ang San Miguel, naibaba nila sa lima ang bentahe ng TNT, 60-65 sa pagtatapos ng third canto.
Naging matatag ang SMB sa fourth quarter upang tuluyan silang makahabol at makuha ang importanteng panalo.
Samantala, nakapasok sa quarterfinals ang NorthPort Batang Pier pero dumaan sila sa butas ng karayom.
Kaya naman muling makikilatis ang 7th seeded Batang Pier laban sa may tangan na twice-to-beat advantage na Rain or Shine Elasto Painters ngayong 4:30 p.m. sa MOA Arena sa Pasay City.
Para kay Batang Pier head coach Pido Jarencio dehado sila sa laban pero gagawin nila ang lahat upang makausad sa susunod na phase. “Dehadong-dehado kami roon. Pero bilog ang bola,” ani Jarencio. “Iba ‘yung lakas ng team na ‘yun (Rain or Shine). Kumpleto ‘yun.”
Inilista ng batang Pier ang 5-6 karta pagkatapos ng 11-game elimination round habang 8-3 ang tinapos ng Elasto Painters.
Nagkaroon ng mahabang pahinga ang E-Painters matapos nilang kalusin ang Meralco Bolts, 88-85 sa kanilang huling laro sa eliminations.
March 15 pa lang ay nakapagpahinga na ang RoS kaya naman sa kanilang three-week break ay nagkaroon sila ng three-day team building sa La Union.(ATD)
Mga laro ngayon: (Mall of Asia Arena)
4:30 p.m. - Rain or Shine vs NorthPort
6:45 p.m. - Phoenix vs Alaska
Comments