12-anyos gustong tangayin | BEBOT ARESTADO

HULI ang isang babae na nagtangka umanong mandukot ng isang bata sa Barangay IVC, Marikina City, kamakalawa ng gabi.

Sa ulat ng Marikina City Police, bandang 8:00 ng gabi ay nakatayo umano ang12-anyos na biktima sa gate ng kanilang bahay sa 28 Dama de Noche Street, Olandes, Barangay IVC nang bigla na lang itong la­pitan ng suspek na si Marjorie Dejan, 27, ng 348 Guerilla Street, Barangay Holy Spirit, Quezon City at kaagad na kinaladkad palayo ang biktima sa lugar.

Napuna naman ng ilang kapitbahay ang ginawa ng suspek at kaagad itong ti­na­nong kung ano ang gina­gawa niya sa bata.

Hindi umano kumibo ang babae at sa halip ay bi­nitawan ang bata at tinang­kang tumakas.

Kaagad namang ipina­abot ng mga kapitbahay sa mga magulang ng bata ang pangyayari at ini-report sa tanggapan ng Police Com­munity Precinct 2 (PCP-2).

Rumesponde ang mga pulis sa pangunguna ni P/Capt. Mauro Gerero at ma­bilis na inaresto ang sus­pek na nahaharap ngayon sa kasong attempted ab­duc­tion in relation to Re­public Act 7610 o Anti-Child Abuse Law.