LTFRB executive, suspendido sa pangingikil

SIYAMNAPUNG araw na suspensiyon ang ipinataw sa mataas na opisyal ng Land Transportation Franchising and Regulatory Board (LTFRB) dahil sa alegasyon ng pangingikil.

Batay sa paunang impormasyon, si LTFRB Executive Director Samuel Jardin ay sinuspinde matapos umanong mangikil ng P4.8 milyon kapalit ng pag-apruba ng aplikasyon para sa Certificate of Public Convenience (CPC) o prangkisa ng ilang bus.

Layon ng preventive suspension na mailayo si Jardin sa posibleng pang-iimpluwensiya sa gagawing pagsisiyasat ng LTFRB.

Ayon sa Department of Transportation (DOTr), kasabay ng suspension order ang pagsasampa ng mga kasong Grave Misconduct at Conduct Prejudicial to the Best Interest of the Service laban kay Jardin.

Binigyan si Jardin ng tatlong araw mula nang matanggap ang kopya ng pormal na reklamo para magsumite ng kanyang tugon sa alegasyon.