1ST AT 2ND PLACE SINA DE ASAS AT CABATIAN SA U-10 CHESS

PAREHONG tumapos sina Aaron Francis De Asas at Clark Jimuel Cabatian na may tigli-5 puntos sa bak­bakan ng mga paslit na disi­pulo ng ahedres upang ma­tagumpay na maangkin ang unang dalawang puwesto ayon sa pagkakasunud-sunod sa Under 10 bracket ng 2019 National Age Group Chess Championship - Lu­zon Qualifying Leg sa Ro­binson’s Place ng Dasmari­ñas, Cavite.

Kinasangkapan ni De Asas, 3rd seed at may rating na 1687, ang halos walang dungis na kartadang apat na panalo, dalawang tabla at wa­lang talo habang limang panalo at isang talo ang si­nandalan ng top ranked na si Cabatian para sa pro­duk­siyon.

Itinanghal na kam­peon si De Asas, 9-anyos dahil sa mas mataas na tie­break points sa paligsahang isina­ayos ng National Chess Federation of the Philip­pines.

Nakuha ni Jeroniel Pe­rez, may rating na 1690 at no. 2 sa pre-tournament fore­cast, ang pangatlong puwesto dahil sa naiposte nitong apat at kalahating puntos (tatlong panalo at tatlong draws) mula sa anim na salang sa board sa kaga­napan kung saan tumayong tournament director si GM Jayson Gonzales at Chief Arbiter si International Ar­biter Gene Poliarco.

Kasama rin sa iba pang nagmarka sa sagupaan na ginamitan ng “60 mins + 30 second increment” na tuntu­nin ang mga sumusunod: Daniella Bianca Cruz at Theodore Jude Garcia (boys U08), Cyrus James Damiray at Charlemagne Romanil­los (boys U12), Chester Neil Reyes at Emcel Jules Gadut (boys U14), Glaiza Celine Romero at Noreen Sciecky Atienza (girls U08), Mecel Angela Gadut at Franiel Angela Magpily (girls U10), Kaye Lalaine Regidor at Rafah Kamillah Ramos (girls U12), Trisha Ann Paez at Shaina Magne Romanil­los (girls U14).

Ang anim na araw na National Finals ay gagana­pin sa Zambales Sports Com­plex Iba, Zambales si­mula ngayong Abril 4, Hu­webes.

Inaasahang dadalo sa pambungad na palatuntunan ang gobernador dito, NCFP prexy Butch Pichay, GM Eugene Torre at WGM Ja­nelle Mae Frayna.