PH-US balikatan, umarangkada na

NGAYONG araw, April 1, ang pormal na pagbu­bu­kas ng Balikatan Exercises sa pagitan ng Pi­lipinas at Amerika na ga­ganapin sa ilang piling lugar sa bansa.

Bilang panimula, ang opening ceremony ay ga­ganapin sa Camp Aguinaldo sa Quezon City kung saan dadaluhan ito ng ilang ma­tataas na opisyal ng Armed Forces of the Philippines (AFP) at US Armed Forces-Asia Pacific Fleet.

Ayon kay Philippine Army Lt. Commander Liz Vidallon, mula ngayong April 1 hang­gang April 12, 2019 tatagal ang military war exercises ng dalawang mag­kaalyadong bansa.

Bago pa man itinakda ang seremonya, nagsagawa na ng humanitarian activities at civic assistance projects ang mga kalahok na U.S. servicemen kung saan libu-libong mga residente ang na­biyayaan ng libreng ser­bisyo.

Isa umano sa mga ina­abangang highlights ng na­turang Balikatan ay ang live firedrill na gaganapin sa Capas, Tarlac sa April 10.

Magkakaroon din ng urban operations, aviation ope­rations at counter-intelli­gence response na ang venue ay gagawin sa Palawan at ilang lugar sa Luzon.

Bukod sa live firedrill, isang senaryo ng live beach amphibious landing exercise ang ipamamalas sa dalam­pasigan ng Zambales, par­tikular sa San Antonio kung saan ilang milya lamang ang layo nito mula sa teritoryo ng Pilipinas na ngayon ay sakop ng China, ang Scar­borough Shoal o Bajo de Masinloc (Panatag) sa West Philippine Sea.

Gayunman, bago pa man ang joint military exer­cise, may mga presensiya na umano ng ilang mga barkong pandigma ng China ang nakaantabay para magban­tay sa paligid ng Scarborough Shoal.