Kung kailangang magbayad ng placement fee ang mga domestic helper

DR. PERSIDA V. RUEDA-ACOSTA / MAGTANONG KAY ATTORNEY

Dear Chief Acosta,

Nais kong malaman kung nararapat ba talagang magbayad ng tinatawag na placement fee kaming mga domestic helper na mamamasukan sa ibang bansa? Sinisingil kasi ako ng panibago kong agency ngunit, wala akong ganitong binayaran sa aking dating agency. — Lisa

Dear Lisa,

Para sa inyong kaalaman, ang panuntunang naaangkop sa inyong sitwasyon ay ang Section 51, Rule V, Part II ng Revised POEA Rules and Regulations Governing the Recruitment and Employment of Landbased Overseas Filipino Workers of 2016 kung saan nakasaad na:

“SECTION 51. Placement Fee. — A placement fee may be charged against the Overseas Filipino Worker equivalent to one (1) month basic salary specified in the POEA approved contract, except for the following:

a)Domestic workers; and

b)Workers to be deployed to countries where the prevailing system, either by law, policy or practice do not allow, directly or indirectly, the charging and collection of recruitment/placement fee.

The worker shall pay the placement fee to the licensed recruitment agency only after signing the POEA approved contract. The agency must issue a BIR-registered receipt stating the date of payment and the exact amount paid.” (Binigyang-diin)

Malinaw sa nabanggit na panuntunan na hindi kasama ang mga domestic worker na tulad mong mamamasukan sa ibang bansa sa pagbabayad ng placement fee. Ang paglabag dito ay maaaring magdulot ng pagkakansela ng lisensiya ng agency at refund ng placement fee na kinolekta sa domestic helper na mayroong kaakibat na legal interest sa halagang anim (6) na porsiyento kada taon mula sa oras ng koleksiyon alinsunod sa Section 143 (g), Rule III, Part VI ng parehong panuntunan.

Nawa ay nasagot namin ang inyong katanungan. Nais naming ipaalala sa inyo na ang opinyong ito ay nakabase sa inyong mga naisalaysay sa inyong liham at sa pagkakaintindi namin dito. Maaaring maiba ang opinyon kung mayroong karagdagang impormasyong ibibigay. Mas mainam kung personal kayong sasangguni sa abogado.

Maraming salamat sa patuloy ninyong pagtitiwala.