VILORIA AT TRINIDAD, PETMALU PARA SA SEAG SKATEBOARDING

MAGANDA na ang ipinakikita sa ensayo nina Luzon leg qualifier Abigail Viloria at Arianne Mae Trinidad sa 2019 Go For Gold Skateboarding National Championships nang pagharian nila ang event at magsilbi itong pasaporte para sa pagsabak nila sa Southeast Asian Games.

Bihirang oportunidad ang nakamit ng dalawa para sa national finals sa Agosto 24-25 sa Sta. Rosa, Laguna matapos manguna sa women’s downhill skate board events sa Luzon qualifying leg. Tinalo ni Trinidad si Jennica Eunesse Gulapa at Gwen Cabangon sa skate board na idinaos sa Novaliches habang si Viloria ng Cavite ang pinakamabilis na competitor sa women’s downhill race.

Pumangalawa si Airish Tenorio ng Camarines Norte at si Julieann Hilario ng Batangas ay 3rd pero nakatiket na sa Sta. Rosa dahil ang podium finishers ay kuwalipikado na sa national championships. “I believe skateboarding is a great sport to encourage our youth. It’s not so expensive and can be done almost anywhere,’’ ayon kay Go For Gold Godfather Jeremy Go. “We hope that our athletes can serve as role models to keep Filipino kids in sports and out of trouble,’’ dagdag ni Go, na VP ng marketing of Powerball Marketing and Logistics Corp., ng Go For Gold program. Ang national finals ng 2019 Go For Gold Skateboarding Championships ay magsisilbing national qualifiers para sa SEAG sa Nob. 30-Dis. 11 na idaraos sa ‘Pinas sa New Clark City, Tarlac.

Sa men’s division, nanguna si Charles Louise “CL’’ Paje sa game of skate nang kaldagin sina Christian Louie Enconado at Mark Garcia. Malupet si Tomas Romualdez ng Laguna sa men’s downhill sa Taysan, Batangas at nanaig sa kapwa Laguna skater na si Sebastian Chanco at Duke Pandeagua ng Camarines Norte.

Ayon kay skateboarding chief Monty Mendigoria, ang Visayas leg ay idaraos sa Cebu City sa Abril 6-7 kung saan si Asian Games gold medalist Margielyn Didal ay naroon din. Dagdag pa ni Mendigoria, pangulo ng Skateboarding and Roller Sports Association of the Philippines na didiskubre sila ng best skaters sa Mindanao sa pagdako ng regionals sa General Santos City sa Mayo 25-26.