MARIANO III, ISANG HAKBANG SA KORONA NG BLITZ ILOILO

SUMULONG si FIDE Master Nelson Mariano III paakyat sa trono ng blitz habang si John Michael Silvederio ang nangibabaw sa bakbakang rapid nang ibaba ang telon ng 2019 SEA Games Chess Eliminations - Visayas Leg sa Cyberzone ng SM City, Iloilo.

Kabuuang 8 puntos mula sa siyam na rounds at ang performance rating na 2367 ang naging armas ni Mariano, dating Far Eastern University stalwart at second seed sa torneo, para makuha ang titulo. Si Mel Vincent Flores (round 1), Cyrus Donasco (round 2), Woman International Master Cristine Rose Mariano (round 3), Silvederio (round 4), Cyril Felrod Telesforo (round 6), Dennis Bernas (round 7), Karlo Britanico (round 8) at National Master Alfred Acaling III nung huling yugto.

Sa kamay ni Fritz Bryan Porras lang nakatikim ng pagkatalo ang kampeon at ito ay naganap noong round 5. Dahil dito, nakuha ni Porras, 3rd ranked sa kompetisyon, ang bridesmaid honors samantalang si pre-tournament favorite Silvederio ay nakun­tento sa pagkuha ng huling upuan sa podium.

Pero nakabawi si Silvederio, may rating na 2220, nang siya ang hiranging kampeon sa bakbakang rapid. Nakalikom siya ng anim na puntos at dinaig niya sa tiebreak si Bernas (rating: 2025) para sa korona. Limang panalo at dalawang draws ang naiposte ni Silvederio. Sorpresang pangatlo sa larangang ito ng paspasang ahedres ang dalagitang si Fiona Geeweeneth Guirhem. Ang 17-taong-gulang na si Guirhem, may rating lang na 1925 ay nakapagsumite ng kartadang 5.5 puntos.