VOLCANOES, ‘DI PAAWAT SA PAGHAHANDA PARA SA SEAG

INAASAHAN na uus­bong ng todo ang laro ng Rugby sa Pilipinas ngayong 2019. Tumitindi na ang pag­hahanda ng Philippine Vol­ca­noes sa kanilang pagsabak sa mga malaki at mahala­gang torneo sa pangunguna ng Southeast Asian Games.

Walang iba kundi gin­tong medalya sa SEAG ang asam ng Volcanoes na unti-unting sinasamahan na ng mga manlalaro na laking Pi­lipinas matapos ang ilang taon na umaasa sa mga Pi­noy na naninirahan sa iba­yong dagat. Maliban sa SEAG, lalahok din ang pam­bansang koponan sa HSBC Cathay Pacific World Series qualifier sa Hong Kong nga­yong Abril 5 hanggang 7 at sa 2020 Tokyo Olympics qualifier sa Nobyembre sa Timog Korea bago ang SEAG.

Ayon kay Jake Letts na General Manager ng Philip­pine Rugby Football Union (PRFU) sa kanilang pagbi­sita sa Philippine Sportswri­ters Association (PSA) Fo­rum sa Amelie Hotel noong Martes, malaki ang posibili­dad na makapasok ang Pili­pinas dahil dalawang bansa galing sa Asya ang lalahok sa Olympics

Hindi pahuhuli ang mga Lady Volcanoes at asam din nila na makuha ang ginto sa SEAG.

Upang maghanda, lalahok din sila sa Asian Rug­by Women’s Champion­ships sa Hunyo at sa Trophy Series sa Indonesia sa Agos­to. Nakatuon din ang pansin ng PRFU sa kinabu­kasan ng laro kaya kasama ang Santos Knight Frank ay patuloy pa rin ang kanilang progra­mang “Get Into Rug­by” upang makaakit sa mga kabataang edad 6 hanggang 16 na maglaro ng Rugby.