ANG kapal din ng mukhang nitong si ex-DFA Sec. Albert del Rosario. Nawala niya at ng kanyang among si dating Pangulong Benigno Simeon “Noynoy” Aquino III ang Scarborough Shoal, ngayon ay pinagtatakpan pa nila ang kanilang kapalpakan.
Ang kasong isinampa ni ex-DFA Del Rosario laban kay Chinese President Xi Jinping sa International Criminal Court (ICC) ay isa lang malaking panakip-butas. Nabistong sila ni ex-P-Noy ang dahilan ng pagkawala sa Pilipinas ng isa sa mga teritoryo nito. Para maintindihan ng lahat ang isyu, kailangang magbalik-tanaw tayo.
Pitong taon na ang nakalipas mula nang magkagirian ang China at Pilipinas sa Scarborough Shoal sa dagat sa may kanlurang bahagi ng ating bansa.
Ang lugar na ito ay maraming isda at matagal nang payapang nangingisda ang mga Pilipino at Chinese. Tahimik ang lahat kumbaga, “share-share” hanggang sa dumating sa eksena ang mga dilawan.
Ang politika ni ex-P-Noy ay pro-US at anti-China. Lahat ng kilos at programa niya ay nakadikit sa platapormang ito na nagnanais panatilihing malakolonya ng US ang Pilipinas.
Noong Abril 2012, inutusan ni ex-P-Noy ang Philippine Navy (PN) na dalhin ang BRP Gregorio del Pilar (warship) sa Scarborough Shoal para arestuhin umano ang mga Chinese na mangingisda.
Siyempre, nagalit ang mga Chinese.
Una, dahil ang pagpapadala ng warship sa lugar ay aktong-militar. Hindi nakatulong na alam ng lahat na ang BRP del Pilar ay “regalo” ng U.S. kay ex-P-Noy (second-hand lang ito).
Hindi naman armado ang mga Chinese na mangingisda kaya hindi maintindihan ng marami kung bakit nagsagawa ng “military act” si ex-P-Noy.
Ikalawang dahilan, mayroon din silang pag-aangkin sa Scarborough Shoal na tinatawag nilang Huangyan Island. Mayroon ding claim ang Taiwan sa lugar na ito.
Bilang sagot sa Pilipinas na nagpadala ng navy nito, nagpadala ang China ng maraming sibilyan na mga barko (hindi militar). Kumbaga, nag-“People Power” ang mga Chinese sa dagat para maprotektahan ang kanilang mga mangingisda. Halos dalawang buwan din ang tensiyunadong sitwasyong ito na ikinatakot na maaaring maging siklab para sa World War III.
Nagsimula na rin noon ang China na ipitin ang ating ekonomiya. Pasimple lang na kilos ang kanilang ginawa, halimbawa, ang paghuli ng export nating saging sa kanilang daungan, sinabi nilang kailangan daw nitong ma-quarantine.
Palagay natin, dito nagsimulang mag-panic sina ex-P-Noy at Del Rosario. Isang tunay na “AmBoy” kaya tumakbo si Del Rosario sa U.S. para humingi ng tulong. Akala siguro niya ay kolonya pa rin tayo ng U.S.
Hoy, Del Rosario, hindi tayo tutulungan ng U.S. kapag nagkaroon tayo ng giyera laban sa China. Numero-unong trading partner nila ang China at inuutangan pa nila ito. Hindi sila engot para magsimula ng World War III para lamang maibsan ang “ego” nina ex-P-Noy at Del Rosario. Ayon kay Del Rosario, inayos na raw ng U.S. ang “simultaneous withdrawal” o sabay na pag-alis ng dalawang bansa mula sa Scarborough Shoal.
Pero, noong umalis tayo ay hindi naman umalis ang China sa lugar. Naisahan tayo ng U.S. at China. Sino ang nawalan sa masamang insidenteng ito? Walang iba kundi ang mga Pilipinong mangingisda na nawalan ng hanapbuhay at ang Republika ng Pilipinas na nawalan ng teritoryo. Sino ang may kasalanan, ang nanggulo sa mapayapang lugar o ang nagtapon ng teritoryo natin? Walang iba kundi ang pro-US-tandem nina ex-P-Noy at Del Rosario!
Alam nang taumbayan ang buong kuwentong ito kaya sirang-sira ang dilawan sa mga botante dahil ayaw na ng mamamayan sa mga palpak na pamamalakad sa gobyerno tulad ng ginawa noon ng administrasyon ni ex-P-Noy.
Kahit ano pa ang gawin ni Del Rosario para “linisin” ang kanyang reputasyon ay sirang-sira na siya. Nabulgar na ang kanyang kapalpakan, kahit mag-iingay pa siya sa ICC at sa buong mundo ay walang mangyayari.
Hindi pa ba niya nabalitaang hindi na miyembro ng ICC ang Pilipinas? Hindi na rin miyembro ng ICC ang U.S. at China kaya walang kuwenta ang kaso ni Del Rosario. Pam-PR na lang niya ito para sa dilawan, desperado na ito dahil wala nang nakikinig sa kanya.