Panawagan sa lahat ng mamamayan, kabataang nakararanas ng depresyon, gabayan at tulungan!
NAKALULUNGKOT dahil patuloy na nadaragdagan ang bilang ng mga batang nagpapakamatay ngayong taon.
Matatandaang, maraming bata ang nagpakamatay ng dahil sa pressure, stress, depresyon at iba’t ibang klase ng problema tulad sa pamilya, pag-ibig, pag-aaral at marami pang iba.
Kaya para sa mga magulang, huwag nating i-pressure ang ating mga anak, lalo na kung tungkol lang ito sa kanilang grado sa eskuwelahan dahil sa totoo lang, ang mas importante ay mayroon silang natututunan at hindi lang matataas ang grado.
Gayunman, dahil iba na ang henerasyon ngayon, matuto rin tayong makibagay kung paano nila in-adapt ang mga paniniwala noong unang panahon, pakinggan din natin ang kanilang mga opinyon dahil kung madalas natin silang kokontrahin, tiyak na pagmumulan lang ito ng away na maaaring humantong sa kamatayan.
Samantala, hinihingi rin natin ang tulong ng gobyerno na sana ay makapag-isip sila ng solusyon para rito, lalo na ngayong hindi na nababase sa edad ang pagpapakamatay ng bawat tao.
Huwag nating hahayaang may mabiktima na naman dahil hindi tayo nag-isip ng paraan kung paano ito matutuldukan.
Mahalaga ang buhay, kaya nakapanghihinayang kung ito ay masasayang!
Kung mauubos o mawawala ang kabataan, sino na lang ang pag-asa ng bayan?
Isalba ang kabataan laban sa pagpapakamatay!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments