Kontra doble-plaka | MGA RIDER NAG-‘PEOPLE POWER’

LIBU-LIBONG mo­torcycle riders sa Metro Manila at iba’t ibang panig ng bansa ang nagtipun-tipon kahapon para magsagawa ng “Unity Ride” bilang pag­poprotesta sa bagong batas na nag-uutos ng paglalagay ng pinalaking plaka sa harap at likod ng motorsiklo.

Kabilang sa nakapaloob sa Republic Act No. 11225 o Motorcycle Crime Preven­tion Act ang paglalagay ng pinalaking mga plaka na ni­lagdaan ni Pangulong Rodri­go Duterte noong Marso 8.

Gamit ang mas malaking plaka na nababasa mula 15 metro at color-coded base sa rehiyon, layon ng batas na ma­pigilan ang krimeng gina­gawa ng mga nakamotor­siklong salarin.

Ayon sa mga organizer, tinatayang nasa 50,000 ri­ders ang lumahok sa “Unity Ride” kung saan binaybay ng mga rider ang EDSA mula sa People Power Mo­nu­ment at umabot hanggang sa Senado sa Pasay.

Unang sinabi ni Motor­cycle Rights Organization Chairman Jober Bolanos na delikado ang paglalagay ng malalaking plaka sa harap ng motorsiklo dahil maaari umanong matanggal ang plaka kapag mabilis ang takbo ng rider, gayundin na maaari itong tumama sa ibang motorista o pedestrian.

Inireklamo rin ng mga rider ang mataas na multa na aabot sa P50,000 hanggang P100,000 sa pagtakip ng nakaw na plaka.

Nakikiisa rin ang 3,000 riders mula Central Luzon sa Unity Ride sa San Fer­nando, Pampanga.

Nagsagawa rin ng Unity Ride ang libu-libong riders mula Batangas, Laguna at Quezon Province habang daan-daang riders ang nag­protesta sa Albay, Iloilo, Neg­ros Occidental at Zam­boanga. (BRT)