Matapos ang madugong pamamaril, "assault weapon" sa New Zealand, aalisin na!

MS. KORINA SANCHEZ / ISYUNG 'K'

SINO ang responsable kung bakit walang Civil Engineer sa Board of Trustees (BOT) ng Metropolitan Waterworks Sewerage System (MWSS)?

Nadiskubre ito sa pagdinig ng Senado tungkol sa nangyaring ‘water shortage’ sa Metro Manila. Anim na abogado, isang Chemical Engineer at dala­wang retiradong hene­ral, ito lamang ang miyembro ng BOT ng MWSS. Ang tanong ng isang senador, paano matutukoy ang proble­ma sa kakulangan ng tubig kung hindi naman mga inhinyero ang mi­yem­bro ng BOT, paano nila ito masosolus­yunan? Idaraan sa pa­giging abogado, sundalo o inhinyero ng mga kemikal.

Ito ang mahirap kapag naglalagay lang ng mga kaibigan o retira­dong heneral sa kung saan-saang ahensiya ng gobyerno — kaibigan, kababayan o sumuporta sa pangulo noong hala­lan. Akala natin, hindi ito gagawin ni P-Duterte dahil kung maaalala natin ay ipinahayag niya ito sa kanyang unang State of the Nation Address (SONA), pero sa kinalaunan ay gayundin ang nangyari. Dapat may karapatan ang sinumang nasa iba’t ibang posis­yon sa gobyerno para matukoy ang mga problemang may kaug­nayan sa kagawaran o ahensiyang pinagsisil­bi­han.

◘◘◘

Agad kumilos ang gobyerno ng New Zealand matapos ang madugong pamamaril ng isang “white supremacist” sa dalawang Mosque sa Christ­church noong nakara­ang Linggo. Ayon sa ulat, 50 umano ang namatay at marami ang sugatan sa nasabing krimen na nakuha pa ng salarin na i-livestream sa social media. Kumi­los na si Prime Minister Jacinda Ardern para ipagbawal ang mga assault weapon sa bansa. Ito ang uri ng baril na ginamit ng salarin para mabilisang makapatay ng tao.

Ayon sa CNN, mara­ming baril sa New Zea­land, pero sa panukala ni Ardern, ipagbabawal na ang mga uri ng baril na ginamit ng salarin at baka bawiin din ang mga naibenta na. Ayon sa CNN, hindi mahirap mangyari ito dahil sa sistema ng gobyerno sa New Zealand kung saan mas mabilis maipatu­tupad ang mga pahayag ng punong ministro. Ikinumpara ito sa Amerika na kahit ilang beses nang nagkaroon ng madugong barilan kung saan-saan, eh, wala pa ring nagbabago sa kanilang “karapatan na magdala ng armas”.