PINOY PASIO MAY REMATCH, BALIK AKSIYON DIN SI NGUYEN

MAY dagdag na bakbakan sa ONE Championship ONE: Roots of Honor na idaraos sa Mall of Asia Arena sa Pasay City sa Abril 12 kung saan muling masisilayan ang pinakamalulupet na lokal at international martial arts talent sa ONE Championship stage at ipakikita ang world-class skills.

Sa main event, dedepensahan ni reigning ONE Featherweight World Champion Martin “The Situ-Asian” Ngu­yen ng Vietnam at Australia ang titulo kontra dating ONE World Champion Narantungalag Jadambaa ng Mongolia.

Nasa co-main event din ang pinaka-aabangang rematch nina dating ONE World Champion Pinoy Joshua “The Passion” Pacio at reigning ONE Strawweight World Cham­pion Yosuke “The Ninja” Saruta ng Japan.

Ang 29-anyos na si Nguyen ay naging isa sa kinatatakutang Asian martial arts talent sa nakaraang ilang taon, wagi sa pito sa huling 9 na laban. Noong 2015, anim ang magkakasunod niyang panalo. Diyan niya nasungkit pareho ang ONE Featherweight at ONE Lightweight World Titles at naging simultaneous two-division ONE World Champion.