Hirit ng ilang mamamayan: Mukha at pangalan ng mga kandidato, nakauumay!
UMAY na umay na ang ilang mamamayan sa mukha at pangalan ng mga kandidato na kanilang nakikita hindi lang sa daan kundi maging sa kanilang bahay at sa mga pampublikong sasakyan.
Sa posts ng ilang netizens sa kanilang social media, mayroon umanong ginawang pantakip sa bintana dahil sa init ng araw ang tarpaulin ng isang kandidato kung saan nakaiirita umano ito dahil ‘yun ang bumubungad sa kanila sa tuwing gigising sila sa umaga. ‘Yun lang!
Mayroon ding sa mismong upuan ng tricycle ay nandu’n ang hitsura ng kandidato, kaya animo’y nauupuan ito na hindi talaga magandang tingnan. Naku!
Gayunman, hindi naman masama ang mangampanya dahil kinakailangan nila ito para iboto sila ng taumbayan, pero kung OA at nakauumay na, kaunting hiya lang ang dapat nilang maramdaman.
Kung maaari ay huwag nang tadtarin ang mga bahay-bahay dahil bukod sa nakadaragdag ito sa kalat ay tandang-tanda naman na natin ang kanilang mga pangalan.
Kung saan bilang botante, responsable rin tayong makilala at alamin kung sino ang dapat nating iboto.
‘Yung tipong hindi na kailangan pang ipamukha sa atin araw-araw na tatakbo sila sa darating na halalan.
Kaya ang pagpapakalat ng mukha at pangalan, limitahan!
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments