UNITED VC, ‘DI PINAPORMA ANG HD, BLAZE SPIKERS, TINUSTA ANG FIBR

INASAHAN ng United Volleyball Club sina Filipino-American star Kalei Mau at import Yaasmeen Bedart-Ghani upang dominahin ang sadsad ng Cignal HD Spikers, 14-25, 25-21, 25-21, 26-24, sa Philippine Superliga Grand Prix kahapon sa FilOil Flying V Centre.

Mainit na laro ang pinakawalan nina Mau at Bedart-Ghani para sa United VC na nagbalik sa winning track kasunod ng pagkatalo sa F2 Logistics sa prestihiyosong women’s club league.

Nagpakawala sina Mau at Bedart-Ghani ng tig-19 na puntos nang makaligtas ang United VC mula sa 29-point explosion ni import Erica Wilson sa bakbakan na isinaere ng ESPN5 at 5Plus bilang broadcast partners.

Isang winning spikes ang ibinagsak ni Bedart-Ghani para makaresbak sa fourth set mula sa 21-23 deficit at umani ng kabuuang 14 spikes, 3 blocks at ace habang si Mau ay umiskor ng 18 point kills kasunod ng matinding depensa at 14 excellent receptions.

“I’m proud of how the girls stayed composed. The girls talked among themselves,” ayon kay United VC head coach Joshua Ylaya, kung saan ang bataan ay umibayo sa 5-4 win-loss slate. “We’re starting zero-zero again, that was a fluke. Let’s start anew and I’m glad that they responded right away.”

Nagpasalamat din si Ylaya kay Amy Ahomiro sa crucial service nang bumaba sila sa 21-23 ng fourth set bago nakaalagwa si import Tai Manu-Olevao sa back-to-back hits at ipatas ang set. Sinikap ni Wilson na buhayin ang HD Spikers, pero ang error ni Ana Artemeva at winning hits ni Bedart-Ghani ang namayani sa United VC para umeskapo sa panalo.

Samantala, sa pangalawang laro, nagwagi rin ang reigning champion Petron para sa ika 10th straight victory kontra PLDT Home Fibr, 25-18, 25-21, 25-14. (MC/VA)