Panawagan sa publiko, kung ayaw maging iligal na OFW, huwag kumagat sa mga sindikato!

RYAN B. SISON / BOSES

SA ngayon ay nakaalerto na ang Bureau of Immigration (BI) sa Ninoy Aquino Interna­tional Airport (NAIA) kontra sa human traf­ficking.

Ito ay matapos mahuli ng ahensiya ang 21 taong gulang na Pinay sa NAIA Terminal 1 na umaming papunta sana sa Saudi Arabia kung saan peke ang mga detalyeng nakalagay sa kanyang pasaporte.

Matatandaang, ang age requirement para maging Overseas Filipino Worker (OFW) ay 23 taong gulang kung saan huling-huli na la­ganap pa rin ang mga sindikato na nanloloko sa mga Pilipino.

Gayunman, ayon sa BI, kung kahina-hinala ang OFW na papaalis pa lamang, maaari silang ilipat sa Travel Control and Enforcement Unit ng BI para sa secondary inspection.

Noong 2018, nakapagtala ng humigit-kumulang 100 underage OFWs sa NAIA, kaya ayaw na nating maulit pa ito.

Samantala, alam naman nating lahat na marami sa ating mga kababayan ang napapa­hamak sa ibang bansa dahil karamihan sa kanila ay iligal na nakapunta roon.

Bagama’t, hindi natin masisisi ang iba dahil sa hirap ng buhay, nakababahala pa rin ito da­hil mismong buhay nila ang kanilang iti­nataya para lang makapaghanapbuhay.

Kaya ang panawagan natin sa pamaha­laan, tuldukan na ang paglaganap ng mga sindi­katong nambibiktima ng mga menor-de-edad na gustong maging OFW dahil sa totoo lang, ma­tinding pasakit lang ang naidudulot nila sa mga Pilipino, gayundin sa ating ekonomiya!

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.