ORCULLO, WALANG KUPAS, HANDA PARA SA U.S. WORLD 10-BALL

NAUNGUSAN ni Dennis “Robocop” Orcullo si Carlo “The Black Tiger” Biado, 100 - 96, sa pagtata­pos ng kanilang tatlong araw na duwelo sa palaruan ng Hustler sa Quezon City.

Mula sa dikdikang 8 - 8 na iskor, nagbadya ng pag­pa­pakain ng alikabok ang dating world 8-ball cham­pion na si Orcullo nang uma­lagwa ito: 35 - 21 at 70 - 60.

Pero nagtiyaga ang 2017 World Games gold medalist na si Biado at ibi­naba sa lima ang kalama­ngan ng karibal, 94 - 99 sa race to 100 na engkwentro. Dito na kinapos si Biado kaya natangay ni Orcullo ang papremyong salapi.

Nagsilbing isang magan­dang paghahanda ng dalawa ang bakbakan para sa 2019 World 10-Ball Champion­ship na gaganapin sa US.

Samantala, halagang $50,000 ang nakataya bi­lang kabuuang papremyo sa 2019 World Pool Billiard Association (WPA) Players’ Championship ngayong Abril 16 hanggang 19 sa palaruan ng Griff’s Billiards sa Las Vegas kung saan seeded entries sina Biado at Johann “Bubwit” Chua.

Pangatlo sa mga pabo­ritong magwagi sa torneo si Biado dala na rin ng kan­yang pagiging world no. 3 sa WPA rankings. Bitbit din ng Pinoy sa paligsahan ang kinang ng pagpasok sa fi­nals ng WPA World 9-Ball Cham­pionship sa nakalipas na dalawang taon. Taong 2017 nang naging World 9-ball king siya samantalang bridesmaid honors ang na­sungkit niya noong isang taon.

Nakaangkla naman si Chua, seeded no. 17 sa palig­sahang nililimitahan lang sa 64 na malulupit na bilyarista mula sa iba’t-ibang parte ng daigdig, sa kambal na All-Japan Billiards na titulo (2015 at 2017) at ang trono ng 2018 Maryland 10 Bar Table Championships noong Nobyembre.

Magsisilbing mga tinik sa lalamunan ng mga Pinoy sa kanilang kampanya sa torneo ang iba pang elite cue artists tulad nina Joshua Fil­ler (Germany, WPA no. 1), Alex­ander Kazakis (Greece, WPA no. 2) at Jung Lin Chang (Taiwan, WPA no. 5).