Umuwi sa Sorsogon at nagsalu-salo kasama ang pamilya at mga kaibigan

Socrates Magnus

Salaminin natin ang panaginip ni James ng James_Santos12@face- book.com

Dear Professor,

Ano ang ibig sabihin nang umuwi ako sa amin sa Sorsogon, tapos, sina­lu­bong ako ng mga kamag-anak namin, dating kaibi­gan at mga kababaryo na­min?

Tapos, sa bahay namin ay may masayang handa­an, sabay-sabay kaming kumain.

Salamat!

Naghihintay,

James

Sa iyo James,

Ngayong bakasyon ay nag-uuwian ang mga tao sa kani-kanilang probinsiya kung saan panahon din ng mga pista at kadalasang isi­nasagawa ang mga espesyal na araw para sa natatanging okasyon tulad ng kasalan, magarbong selebrasyon ng araw ng kapanganakan, kum­baga, kapag ang birth­day ay natapat sa summer, hindi maiiwasang mag­han­da nang bongga.

Alam mo, iho, may ma­lalim na kahulugan ang pag-uwi sa lupang sinilangan, kumbaga, hindi lang ito para magsaya, mamasyal at mag­sama-sama ang magkaka­pamilya at magkakaibigan.

Ang pag-uwi sa lupang sinilangan ay nagbibigay ng sigla, lakas at ligaya, pero ang termino o angkop na sa­lita ay ang rebirth o muling pagsilang.

Ito ay nararanasan ng mga matagal ng hindi naka­babalik sa kanilang lupang sinilangan. Ito rin ay nang­ya­yari sa mga taong sob­rang problemado, may sakit at nabigo sa buhay, lovelife man ito o career.

Sa buong mundo, sa la­hat ng pamayanan ay may walang kamatayang kuwen­to na may nilalang umano na napalaban kung saan ang kalaban niya sa biglang ti­ngin ay tinatalo siya, pero sa tuwing siya ay babagsak sa lupa ay muli siyang luma­lakas.

Kumbaga, tuwing tata­maan siya ng malakas na bigwas nito ay nabubuwal siya, kaya inaakala ng kan­yang kalaban na siya ay talo na, pero tulad ng nasabi na, sa tuwing siya ay sasayad sa lupa, bumabalik ang lakas niya, kaya sa huli ay sumu­suko na ang nakalaban niya.

Malalim ang kahulugan at sa panahong ito ay itinu­turing na lang itong mitolo­hiya, pero kapag ang nagku­wento ay mga OFW, sila ang magpapatunay na kaka­ibang lakas ang kanilang na­darama sa tuwing umuuwi sila sa ka­nilang lupang si­nilangan.

Ito rin ang mensahe ng iyong panaginip, pero hindi lang ito simpleng mensahe dahil ipinapayo sa iyo na umuwi ka sa Sorsogon ka­pag nagkaroon ka ng pag­kakataon.

Hanggang sa muli, Professor Seigusmundo del Mundo