EVANGELISTA AT NUQUI, ARANGKADA SA WORLD BOWLING SA FRANCE
GUMUGULONG na ang 2019 World Bowling Junior Championships sa palaruan ng Plaza Bowling sa St. Maximin, France at apat na manlalaro mula sa Pilipinas ang pipiliting ipagpatuloy ang makinang na tradisyon ng bansa sa pandaigdigang entablado.
Ang tambalan nina Danielle Evangelista at Patrick Nuqui ay sasabak sa boys’ arena habang sina Grace Gella at Norel Nuevo ang magdadala ng Philippine tri-colors sa grupo ng mga dalagita sa halos isang linggong kompetisyong matatapos ngayong Sabado.
Nakataya sa boys’ at sa girls’ bracket ang korona sa singles, doubles at masters gayundin ang mixed team event sa paligsahang inoorganisa ng World Bowling, Maximin Bowling Plaza at ng Tenpin Bowling Association of France.
Ang mga kalahok sa sagupaan ay nakalatag sa may 60 km ang layo sa France na nilimitahan lang doon sa mga ipinanganak ng Enero 1, 2001 hanggang Disyembre 31, 2005.
Ang national quartet ay aalalayan nina Alexander Lim (manager), Engelberto Rivera (coach) at Josephine Canare (coach) sa pakikipagbanggaan nila sa may 110 na kinatawan ng 35 bansa kabilang na ang Australia, Brazil, China, Columbia, U.S.A, Taiwan, Thailand, Singapore, Ukraine, Hong Kong, Italy, Korea, Mexico, Guatemala, Germany, England, Ecuador, Kuwait, Russia, Poland at ang punong-abalang France.
Naisalba ng Pilipinas ang isang tansong medalya noong 2018 edisyon ng torneo sa Thunderbowl Lanes ng Michigan, U.S.A nang makapasok sa semifinals ang boys’ team nina Ivan Malig, Kenzo Umali, Praise Gahol at Merwin Tan.
Samantala, sa duwelong all-or-nothing na $40,000 sa pagitan nina Dennis “Robocop” Orcullo at Carlo “The Black Tiger” Biado, nagbanta ng pag-alagwa ang dating world 8-ball titlist na si Orcullo sa iskor na 35 - 21.
Pero pumalag si 2017 world 9-ball king Biado at unti-unting nagbawas ng hinahabol at ngayon ay nakapako na ang bakbakan sa rekord na 70 - 60 bentahe pa rin ni Orcullo.
Ang bakbakan ay sa larangan ng 10-ball at unahan sa 100 panalo ang tuntunin sa loob ng tatlong araw sa Quezon City.
Sinasabing magandang paghahanda ito ng dalawang malupit na bilyaristang Pinoy para sa World 10-Ball Championships na gaganapin sa US ngayong taong ito.
Comments