Mga pangalan ng 2 sikat na artista na suki ng droga, kailan ilalabas?!
MATATANDAANG, nito lamang ay may napatay na bigtime party drug dealer kung saan nabuking ang mga kliyente nito na kinabibilangan ng mga estudyante at dalawang sikat na artista, babae at lalaki na um-order pa umano ng 200 ecstasies.
Base sa imbestigasyon ng Philippine Drug Enforcement Agency (PDEA), mino-monitor nila ang nasabing drug dealer nang bigla umanong may nag-text dito kung saan nabuking ang mga suki nito.
Gayunman, ayon kay PDEA Special Enforcement Services (SES) Acting Director Levi Ortiz, hindi pa umano mapapangalanan ang mga ito dahil kasalukuyan pang ginagawa ang imbestigasyon at hindi rin sila sigurado kung totoo ba ito o gumamit lang ng alyas si Steve Pasion, ang drug dealer.
Samantala, hindi na nakapagtataka na may mga celebrity na masasangkot sa iligal na droga dahil tulad ng mga pulitiko ay makapangyarihan at mapera rin sila.
Pero, hindi porke may kakayahan silang protektahan ang kanilang mga pangalan ay hanggang du’n na lang ito, lalo na kung mapatutunayan na guilty sila sa nasabing krimen.
Ito ang nakaiinis sa Pilipinas, ‘yung tipong kapag ordinaryong tao, eh, tumba agad tapos ‘yung iba, tinataniman pa ng iligal na droga at sasabihing nanlaban para mapatay, pero ‘yung mga prominenteng tao kahit huling-huli na sa akto, protektadung-protektado pa rin! Nasaan ang hustisya?!
Kaya naman, ang panawagan natin sa PDEA, bilisan ang imbestigasyon nang sa gayun ay hindi ito mapaglipasan ng panahon dahil tiyak na mababaon lang ito sa limot ‘pag nagkataon.
Ang tanong, kumusta na nga ba ang pagtukoy sa mga celebrity na isinasangkot sa iligal na droga?
Bakit walang nabu-BULGAR na narco-celebrities? Hmmm…
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments