Kandidatong nasa narco-list, tuloy — comelec

HINDI maaaring madiskuwalipika ang mga kandidatong nakasama sa inilabas na narco-list ni Pangulong Rodrigo Duterte.

Paliwanag ni Commission on Elections (Comelec) Spokesperson James Jimenez, maaari lamang madiskuwalipika ang kandidato kung may final conviction na rito kaugnay sa kinahaharap na kaso.

Maaari lamang din aniya na maging pinal ang diskuwalipikasyon ng kandidato sa sandaling maisagawa ang lahat ng proseso at mismong ang Korte Suprema na ang magdedesisyon dito.

Gayunman, maaari aniyang makaapekto at makaimpluwensiya sa mga botante ang pagkakasama ng mga nasabing kandidato sa narco-list.

Una nang isinapubliko ni Pangulong Duterte ang mga pangalan ng mga pulitikong hinihinalang sangkot sa aktibidad ng iligal na droga sa bansa.