ADAMSON U, NASA TOP RANKING NA SA FINAL 4 VS. NU SA UAAP SOFTBALL
NAKAMIT ng defending 8-time champion Adamson University ang top ranking sa Final Four matapos ang abbreviated 9-2 panalo kontra National University noong Huwebes sa UAAP Season ‘81 softball tournament sa Rizal Memorial Baseball Stadium.
Kinailangan lang ng Lady Falcons ng apat na innings upang makamit ang ika-9 na panalo kontra isang talo, may dalawa pang larong nalalabi sa elimination round.
“At least, top seed kami ngayon. Ang mentality namin ngayon is mag-prepare para sa semis,” pahayag ni Adamson University coach Ana Santiago.
Sa iba pang laban, kinailangan ng De La Salle ng extra inning upang makaungos sa University of the East, 8-7, at maangkin ang ikalawang semis berth.
Umiskor ng dalawang home runs si Charlotte Sales upang pamunuan ang UST sa kanilang abbreviated 7-0 panalo kontra Ateneo.
Umangat ang Lady Batters sa barahang 7-3 kasunod ang Tigresses na may 6-4 na marka na nakalayo ng bahagya sa UP at NU na may patas na 5-5 na kartada.
Sa baseball, tumabla ang De La Salle sa pamumuno sa Ateneo na natalo sa NU, 1-6, pagkaraang igupo ang UST, 21-5. Wagi rin ang titleholder Adamson University kontra UP, 6-4, na nag-angat dito sa patas na barahang 4-4, kasalo ng Growling Tigers. (VA)
Comments