Para makaiwas sa pangongotong | Pagsusuot ng shorts habang nagmomotorsiklo, tuloy!

RYAN B. SISON / BOSES

KASUNOD ng isyu sa plaka ng mga motorsiklo, ang rekomendasyon hing­gil sa pagbabawal sa mga naka-shorts na sumakay at magmaneho ng motor, ga­yun­din ang kanilang angkas ay pina­lagan ng ilang motorista.

Bagama’t, kaligtasan ng motorista ang nakasalalay dito, abala at malaking isyu ito para sa kanila.

Gayunman, ayon kay Metropolitan Manila Development Authority (MMDA) General Manager Jojo Garcia, hindi pa umano ito pinal kaya ngayon ay malaya pa ang iba na suotin kung ano ang gusto nila dahil hindi pa sila hu­hulihin ng kapulisan.

Dagdag pa rito, kung sakaling ma­ipa­tutupad ito ay maaari itong maging sanhi ng pangongotong dahil tiyak na mara­ming mananamantala sa nasa­bing suhes­tiyon kung saan dahil sa rami ng bilang ng lalabag ay idaraan nila ito sa pakiusap na may kasamang bayad. ‘Yun lang!

Samantala, para sa mga motorista, kahit hindi pa ito naisasabatas, isipin pa rin ninyo ang inyong kaligtasan ‘yung tipong kahit hindi iutos, eh, dapat mag­suot pa rin kayo ng mga damit na naa­angkop, lalo na at talamak ngayon ang iba’t ibang klase ng disgrasya, parti­kular kapag motorsiklo ang dala-dala.

‘Ika nga ng iba, sa simpleng bagay na nakaliligtaan, madalas, ito pa ang sanhi ng kapahamakan.

Kaya ang panawagan natin sa lahat, makipagtulungan tayo para sa mas payapa at maayos na bansa dahil tayo rin naman ang higit na makiki­nabang dito.

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.