Edukasyon ng mga out-of-school youth, bigyang-prayoridad!

KUYA WIN GATCHALIAN / WIN TAYONG LAHAT

ANG kabataan ang pundasyon ng kinabu­ka­san ng ating bansa, ang pag-asa ng bayan tungo sa mabuting buhay at ang lakas ng lipu­nan na magpapaunlad sa susunod na hene­rasyon.

Mahalaga na walang hadlang at pantay-pantay ang pagtrato kahit anuman ang katayuan sa buhay. Kasama rin dito ang kanilang kara­patang maging masaya, produktibo at magta­gumpay sa mga pangarap tulad ng pagtatapos sa pag-aaral.

Ayon sa pag-aaral ng World Bank na “Out-of-School Children and Youth in the Philippines: Issues and Opportunities”, humigit-kumulang 8 hanggang 10 milyon ang mga out-of-school youth sa ating bansa. Nag-triple ito sa loob ng nagdaang dekada kung saan ang pinakamataas na porsiyento ay matatagpuan sa National Capital Region (NCR).

Ang out-of-school youth o OSY ay mga miyembro ng pamilyang may edad 6 hanggang 17 na hindi nabigyan ng oportunidad na ma­kapag-aral sa pormal na paaralan, habang ang 18 hanggang 24 taong gulang naman ay hindi naka-enroll sa paaralan na hindi nakapagtapos sa kolehiyo at walang trabaho.

Ang layunin ng panukalang-batas na Se­nate Bill. No. 1000 o Magna Carta of the Out-of-School Youth na magsagawa ng programang technical at vocational trainings para sa kanila at ng Alternative Learning System (ALS) sa pa­mamagitan ng non-formal education at school-based programs mula sa basic educa­tion hanggang kolehiyo.

Walang babayarang matrikula ang mga mag-aaral na naka-enroll dito, maging ang lahat ng materyales na kanilang gagamitin sa pag-aaral. Kapag sila ay nakapagtapos na ng kolehiyo, ang bawat isa ay mabibigyan ng oportunidad na makapagtrabaho sa gobyerno na hindi ba­baba sa dalawang taon.

Ang Alternative Learning System Accredita­tion and Equivalency Classes (ALS A&E) and Livelihood Programs ng Department of Edu­cation (DepEd) ay binuo upang matulungan ang mga OSY, manggagawa, may kapansanan, nakalaya sa bilangguan, dating rebelde ng gob­yerno, katutubo at iba pang nahinto sa pag-a­aral, ngunit, gustong muling makabalik at ma­tuto.

Ang Department of Health (DOH) naman ay makikipagtulungan sa lokal na pamahalaan upang magkaloob ng malawakang programa. Katuwang ang Department of Social Welfare and Development (DSWD) at Out-of-School Youth Welfare Council, sila ay magdaraos ng so­cial activities para sa kabataan tulad ng pag­lalaro, pagsasayaw, arts at crafts upang mapa­unlad ang sarili at kapakanan para sa kanilang kinabukasan.

Ang mga OSY na humaharap sa mahihirap na sitwasyon tulad ng biktima ng pisikal at sek­suwal na pang-aabuso, prostitusyon, human traf­­fic­king, panggagahasa, insesto at mga ka­ugnay nito ay pagkakalooban ng protective cus­tody, medical at dental services, psycholo­gical evaluation, counseling, financial assistance at iba pa.

Naniniwala tayong sa pamamagitan ng angkop na mga batas sa ating bansa ay maka­tutulong sa pagtupad ng mga obligasyon ng pamahalaan sa taumbayan at koordinasyon sa mga kapwa-miyembro natin sa Association of Southeast Asian Nations (ASEAN) para sa ka­pakanan ng mga OSY.

Bilang indibidwal na malapit ang loob sa kabataan, hangad nating gawing prayoridad ang paggawa ng mga panukalang-batas na mag­papabuti ng sistema ng edukasyon. Patuloy pa nating tututukan ang mga ito upang ganap nang maging batas para mapakinabangan ng ating mga kababayan!

May katanungan ka ba, reklamo o naisihingi ng tulong? Sumulat sa WIN TAYONG LAHAT ni Kuya Win Gatchalian, BULGAR Bldg., 538 QuezonAve., Quezon City o mag-email sa surewin.bulgar@gmail.com