MAY PIPIGIL PA BA SA DOMINASYON NG RISERS AT KINGS SA 3X3 CUP?

MAGKAKAROON na ba ng iba o magpapatuloy ang dominasyon ng 1Bataan Risers at Grindhouse Kings-Pasig sa ika-apat na yugto ng Chooks To Go Pilipinas 3X3 President’s Cup? Ba­balik ang mainit na aksyon sa SM Megamall ngayong Sabado simula 11:00 a.m. matapos ang matagumpay na ikatlong yugto noong na­karaang Marso 1 sa SM City Fairview kung saan na­sung­kit ng Risers ang kanilang panga­lawang korona nang talunin ang Grindhouse, 21-19.

Ilan sa mga napipisil na wasakin ang dominasyon ng dalawa ay mga nakapasok na sa semifinals noon tulad ng Go-For-Gold-San Juan Knights, Pasay Voyagers, Vigan Baluarte Wolves at Valenzuela Classic. Nariyan din ang Marikina Shoe­masters na nagpalasap ng talo sa 1Bataan noong nakaraang linggo salamat sa husay ng laro ni Gerald Anderson.

Samantala, tiyak na gaga­wa ng paraan ang mga kopo­nan ng Max4 Birada-Cebu, Zamboanga Valientes, Baco­or Strikers, Bulacan Kuyas at Zark’s Burger-Quezon City para mabigyan ng lunas ang kanilang kam­panya. Kailangan nilang ma­ka­likom ng maraming puntos upang makahabol sa mga liderato.

Sa ngayon, ang 1Bataan at Grindhouse ang nangu­nguna sa pangkalahatang standings na pinagsamang puntos mula sa unang tatlong yugto. Kampeon ang Risers sa unang yugto pero bu­mawi ang Grindhouse para maagaw ang pangalawang yugto.

Ang dalawang pinaka­ma­­taas na koponan pagka­tapos ng anim na yugto ay ka­­katawan sa Pilipinas sa parating na Asia Pacific Super Quest sa Abril. Haha­rapin nila ang mga mala­lakas na koponan ga­ling Euro­pa at tutuloy sa FIBA 3X3 World Tour ang mga mag­wa­wagi. (A. Servinio)