KORONA, ‘DI BIBITIWAN NG PARAÑAQUE SA NBL?

SISIMULAN ng Parañaque ang kanilang kampanya para mapanatili ang korona sa pagsisimula ng pangalawang season ng National Basketball League (NBL) na gaganapin sa Sta. Rosa Multi-Purpose Complex sa City of Sta. Rosa, Laguna.

Kakaharapin ng Parañaque Aces ang Laguna Pistons sa pangalawang laro ng doubleheader ng 6 p.m. Nanaig ang Parañaque sa unang season ng liga matapos daigin ang Dasmariñas Ballers sa best-of-three serye. Ayon kay Parañaque coach Harold Sta. Cruz, hindi magiging madali para sa Aces ang pagdepensa sa korona lalo pa’t 15 koponan ang maglalaro ngayong pangalawang season ng liga kabilang ang Aces.

“Sinabi ko tapos na ‘yung last season. Kung kaya namin i-defend ‘yung championship, why not. Hard practice pa rin kami para pagdating sa game, laging go hard,” saad ni Sta. Cruz.

Impresibo ang Laguna Pistons sa katatapos lamang na preseason pagkaraang maipanalo ang dalawang laro. Maghaharap ang Ballers at Taguig Generals sa unang laro sa ganap na 4 p.m. pagkatapos ng opening ceremony na gaganapin ng 3 p.m. (Alvin Olivar)