4 tiklo sa droga

APAT na hinihinalang sangkot sa iligal na droga kabilang ang dalawang nagbenta ng shabu sa pulis ang arestado sa ikinasang buy-bust operation sa Valenzuela City, kahapon ng madaling-araw.

Kinilala ni Valenzuela Police Chief P/Col. David Nicolas Poklay ang mga naaresto na sina Jordan dela Cruz, 24; Mark Bench Torcuator, 20; Ronnie Rase, 30, at Rey Daniel Balangue, 21.

Ayon kay PS/Sgt. Ana Liza Antonio, ala-1:00 ng madaling-araw nang isagawa ng mga operatiba ng Station Drug Enforcement Unit sa pangunguna ni P/Maj. Jowilouie Bilaro ang buy-bust operation kontra kina Dela Cuz at Torcuator sa Calle Onse St. sa koordinasyon sa PDEA.

Isang undercover police na nagpanggap na poseur-buyer ang nakaiskor ng isang sachet ng shabu na nagkakahalaga sa P200 kina Dela Cruz at Torcuator.

Nang magkaabutan, agad sumalakay ang back-up na mga operatiba at dinamba ang mga suspek kasama sina Rase at Balangue na kaiiskor lang umano ng shabu.

Narekober sa mga suspek ang anim na sachets ng hinihinalang shabu, buy-bust money at P300.