LAKERS NI LEBRON OLATS SA CLIPPERS SPURS, ‘DI NAHABOL NG NUGGETS

NAKAGAWA si Danilo Gallinari ng 23 points nang talunin ng bisitang Los Angeles Clippers ang Los Angeles Lakers 113-105 sa NBA game kahapon sa ikatlong sunod na panalo.

Bumasket si Lou Williams ng 21 puntos, may dagdag si Montrezl Harrell ng 14 points at 11 rebounds bilang reserba sa Clippers na balik ang posisyon sa 7th place sa Western Conference, isang half-game sa likod ng Utah Jazz at half-game na nakakaungos sa San Antonio Spurs.

Umiskor din si Shai Gilgeous-Alexander ng 14 points at si Patrick Beverley ay dumagdag ng 13 points, 9 rebounds at 5 steals para sa Clippers. May 12 puntos si Landry Shamet.

Samantala sa iba pang laban, humalibas si DeMar DeRozan ng 24 points habang si LaMarcus Aldridge ay may 22 points nang talunin ng San Antonio Spurs ang bisitang Denver Nuggets 104-103 para sa ikatlong straight victory.

Lumamang ang San Antonio sa 21 points sa second quarter at may 17 sa 9:10 minuto na nalalabi sa laro, may 4 puntos pang hahabulin ang Denver sa natitirang 1:41 nang makagawa ng tres si Will Barton.

Pagkaraan ay nakapagtarak si Jamal Murray ng tres puntos sa nalalabing 49.6 seconds para dumikit sa iskor ng Spurs 104-103. Pero sumablay si DeRozan sa layup sa nalalabing 29.3 segundo at nasundan ng mintis na 3 puntos ni Murray sa natitirang 16.2 segundo. (MC)