Diokno, bagong BSP governor

ITINALAGA ni Pangulong Rodrigo Duterte si Budget Secretary Benjamin Diokno bilang bagong governor ng Bangko Sentral ng Pilipinas (BSP).

Ito ang kinumpirma ni Executive Secretary Salvador Medialdea matapos ang cabinet meeting na pinangunahan ng pangulo nitong Lunes.

Batay sa BSP Charter, pupunuan ni Diokno ang nalalabi sa anim na taong termino ni Governor Nestor Espenilla, Jr., na nagsimula noong July 3, 2017 at magtatapos sa 2023.

Pumanaw si Espenilla, 60, noong February 23 dahil sa cancer.

Kaugnay nito, itinalaga ng pangulo ang Bar topnotcher na si Budget Undersecretary Janet Abuel bilang acting secretary ng Department of Budget and Management (DBM) bilang kapalit ni Diokno.

Sinabi ni Diokno na si Abuel ay nagtapos ng Master of Public Administration sa Lee Kwan Yu University sa Singapore at Master of Laws sa University of Sydney sa Australia.

Samantala, nagpapasalamat naman ang Malacañang sa serbisyo ni Sec. Diokno sa DBM.

Ayon kay Presidential Spokesman Salvador Panelo, itinalaga ng pangulo si Diokno dahil sa integrity, competence at expertise nito.

Matatandaang, nakabanggaan ng mga kongresista si Diokno dahil umano sa mga isiningit na pondo sa 2019 National Budget, na mariin namang itinanggi ng kalihim.