DREAM TEAM ANG AABANGAN SA UP VS ATENEO NG UAAP 3X3

MUKHANG hangad paabutin ng nakaraang men’s basketball finalists University of the Philippines at nag­kampeong Ateneo de Manila University ang kanilang naging tapatan sa halfcourt sa nakatakda nilang pagsabak sa UAAP Season 81 3×3 Bas­ketball Tournament ba­tay sa kanilang mga line-up. Tila “Dream Team” ang koponang binuo ng UP mata­pos pagsama-sama­hin sina FIBA 3×3 veterans Ricci Ri­vero, Kobe Paras, Juan Gomez de Liano at kapatid nitong si Javi Go­mez de Liano.

Kakatawanin ang Blue Ea­gles nina PSA Amateur Basketball Player of the Year Thirdy Ravena, Matt Nieto, Angelo Kou­ame at Matthew Daves.

Babalik para sa defending cham­pions Far Eastern University Tamaraws sina Wendell Comboy at Kenneth Tuffin kasama sina Alec Stockton at Clifford Jopia.

Sa taong ito, kasali na ang University of Santo Tomas Growling Tigers na kakata­wanin nina Renzo Subido, Soulemane Chabi Yo, Dave Ando, at Rhenz Abando.

Ang iba pang mga koponang kalahok sa taong ito ay ang - Adamson (Jerrick Ahanmisi, Simon Camacho, Jerome Lastimosa at Keith Zaldi­var), De La Salle (Jordan Bartlett, Mark Dyke, Christian Manaytay, at Encho Serrano) at National University (Daniel Chatman, JV Gallego, Michael Ma­lonzo, at Karl Pe­nano).

Nag­desis­yon na huwag sumali nga­yong taon ang last season runner-up University of the East Red War­­riors. Sa wo­men’s division, hangad na ma­bigyan ng ti­tulo sa huling pagkaka­taon ni Ria Nabalan ang NU Lady Bulldogs.

Kasamang magdede­pensa ng women’s title ng graduating na si Naba­lan sina Jack Animam, Rhena Itesi, at Monique del Carmen. (VA)