Mga kumpanyang iiwasan ang Expanded Maternity Leave Law kung saan tatanggap lang ng mga lalaking emp

RYAN B. SISON / BOSES

MATAPOS maisabatas ang Expanded Maternity Leave Law, nabahala ang ilang ka­babaihan sa posibilidad umanong mas mamili ng mga lalaking manggagawa ang iba’t ibang employer sa bansa.

Kaya naman kasunod nito, nagbabala si Gabriela Rep. Arlene Brosas sa mga kum­panya na kung gagawin ang ganitong sistema ay maaari silang lumabag sa Magna Carta of Women at sa bagong lagdang batas dahil na­kasaad dito ang pagbabawal sa diskriminasyon sa female applicants kung saan may kapalit itong parusa at multa.

Gayunman, kung tutuusin umano ay na­pakaliit lang ng bilang ng mga buntis na mang­gagawa kung ikukumpara sa kabuuang sahod ng kababaihan.

Bukod pa rito, hindi lingid sa ating kaala­man na hindi lahat ay nakapaghahain ng ma­ternity leave sa trabaho dahil sa isyu ng kon­traktuwalisasyon.

Bagama’t, wala pang naiuulat na reklamo hinggil dito ay pinangungunahan na ito ng mga eksperto dahil kung sakaling mangya­yari ito ay tiyak na marami ang maaapektuhan, lalo na ang mga nanay na mag-isang nagta­taguyod ng kanilang pamilya.

Samantala, buwelta naman ni Rep. Emmi de Jesus, walang dapat ikabahala ang mga grupong pumoprotekta sa karapatan ng ka­babaihan dahil marami umanong sub-sectors sa hiring process na karamihan ay mga babae ang nagtatrabaho.

Pero, ang paalala natin sa lahat, sa halip na pairalin ang diskriminasyon, mas bigyang-halaga ang kakayahan ng tao kung ano ang maaari niyang maibigay sa kumpanya.

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.