MARINERO, PINERDER ANG NU SA D-LEAGUE

NAKABANGON sa kanilang naunang pagka­talo ang Marinerong Pili­pino matapos igupo ang SMDC-NU, 86-71, kama­kalawa sa 2019 PBA D-Lea­gue sa Paco Arena sa Ma­nila.

Pinangunahan ni Santi Santillan ang naturang unang panalo ng Skippers sa kanyang itinalang 18 pun­tos, 13 rebounds at tig-2 assists at steals kasunod si Anton Asistio na may 14 puntos at 4 na rebounds.

“Yun na ang Anton Asistio at Santi Santillan na hinahanap namin. Iba ang experience nila at na­dadala nila sa Marinero,” ani coach Yong Garcia.

Nauna rito, isinalansan ni Orlan Wamar ang 11 sa kanyang 13 puntos na out­put sa first half upang pa­munuan ang 28-puntos na ratsada ng Marinero sa se­cond-period na nagresulta sa 47-29 bentahe sa half­time.

Tumaas pa ito sa 21, 50-29, kasunod ng triple mula kay Santillan, ngunit nakuha pang humabol ng SMDC-NU at tinapyas ang kalamangan sa anim, 63-57 papasok sa payoff pe­riod.

Pero muling kumama­da ang Skippers 15-2 blast upang ibalik ang kalama­ngan sa 21-puntos, 84-63 upang tiyakin ang panalo.

“I’m so happy na naka­bawi kami sa first loss na­min and I told my players na masaya ako na na-run nila ang gameplan na­min,” ayon pa kay Garcia.

Nanguna si John Gali­nato sa winless na Bull­dogs (0-2) sa ipinoste ni­tong 17 puntos, 3 rebounds, at 3 ding assists. (VA)