Pambu-bully, nakunan sa video | 11 years old na babae, 7 beses na sinampal ng mga kaibigan!

RYAN B. SISON / BOSES

KAHIT kailan, ang “BULLYING” ay hindi dapat kinukunsinte ninuman dahil isa ito sa mga dahilan kaya maraming indibidwal ang nagkakaroon ng depresyon at kinikitil ang sarili nilang buhay.

Sa isyung ito, mayroon tayong nakapa­nayam na ina kung saan biktima ang kanyang anak na edad 11 ng pambu-bully ng mismo nitong mga kaibigan.

Base sa kuwento ng ina ng biktima, dahil umano sa murang edad ng kanyang anak ay madali itong nauuto at napapasunod ng kan­yang mga kaibigan na nasa mga edad 12, 14 at 18 kung saan maging ang mga personal na gamit nito ay kaya nilang pakialaman tulad ng cellphone at maging ang social media ac­counts.

Aniya, malihim ang kanyang anak kaya inaakala niyang itinatrato ito nang maayos ng mga kaibigan ngunit, dahil sa “group chat” ay nakita umano niya ang tunay na pag-uugali ng mga ito kung saan nakunan sa video kung paano pinagsasampal nang malakas ang kanyang anak na umabot umano sa 7 beses.

Kahit sinong magulang, kung makapano­nood ng ganito na ang biktima ay ang kanyang anak, tiyak na may halong panggigigil, galit at pagsisisi ang kanyang mararamdaman.

Kaya naman nakalulungkot dahil imbes na naglalaro at inosente pa ang kabataan ay nakagagawa na sila ng mga bagay na hindi ma­ganda at maaaring magmitsa ng kama­tayan.

Gayunman, marami pa ring mga magulang ang binabalewala ang ganitong mga posibleng sitwasyon kaya hanggang ngayon, mayroon pa ring nagiging biktima ng pang-aabuso.

Matatandaang, sa nagdaang mga taon, ilang kaso na ng pambu-bully ang ating na­saksihan kung saan mayroong sinaktan sa salita, pisikal at ‘yung iba dahil hindi na kinaya ang pananakit sa kanila kaya mas pinili na lang na manahimik, habambuhay.

Ang tanong, sino ba ang higit na may pag­kukulang at paano ba natin ito maiiwasan?

Bagama’t, hindi madali ay dapat maging handa tayo sa mga pangyayaring tulad nito, kaya sa mga magulang, ang panawagan natin ay bantayan ninyo ang inyong mga anak at kilalanin ninyo kung sino ang kanilang mga nakasasalamuha, gayundin turuan ninyo sila ng magandang-asal na dapat ay nagsisimula sa loob ng bahay.

Huwag tayong magbingi-bingihan o mag­bulag-bulagan dahil totoong iba na ang he­nerasyon ngayon at ‘yun ay dapat nating big­yang-pansin dahil kung hindi, maaari ang isa sa ating mga mahal sa buhay ang maging biktima nang walang kalaban-laban.

Samantala, hiling natin na mapagbayaran ng mga kabataang nanakit ang kanilang gi­nawa sa biktima nang sa gayun ay madisiplina sila.

STOP BULLYING!

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.