Nanakit at nagbanta sa buhay ng babae at driver | Anak ako ng mayor!

RYAN B. SISON / BOSES

“ANAK AKO NG MAYOR”!

Ganito ang banat ng isang lalaki na nanam­pal at nagbanta umano sa buhay ng driver at babae sa Sierra Madre Mountain Resort kung saan naganap ang insidente.

Base sa kuwento ng biktima na si alyas Ria, habang inaayos ng kanilang driver ang pagka­kaparada sa kanilang sasakyan ay isang babae umano ang bigla na lamang nagalit dito at nag­sisigaw dahil inaakusahan nito ang kanilang driver na naatrasan siya at ang kanyang anak.

Pagkatapos nito ay biglang umalis ang babae at makalipas ang 15 hanggang 20 minuto ay bumalik ito kasama ang kanyang asawa na nag­pa­kilalang “anak ng mayor” na bigla na lamang nanampal, gayundin na binantaan ang kanilang buhay na pagbabarilin umano silang lahat.

Nang tangkaing magpaliwanag at umawat si Ria ay siya naman umano ang sinampal nito.

Sinabi rin umano ng lalaki na mainit ang kan­yang ulo dahil sa biglaang paggising sa kanya ng kanyang asawa.

Dahil dito, hindi napigilan ni Ria na mag-post ng hinaing niya sa social media kung saan umani ng pambabatikos ang lalaki mula sa ne­tizens.

Gayunman, hindi tamang dahilan na mainit ang ulo para manakit tayo kung may problema, dapat pinag-usapan na lang muna ito nang maayos nang sa gayun ay hindi na lumaki pa.

Dagdag pa rito, hindi rin tama na gamitin ang katungkulan ng kahit na sinong kamag-anak para manakot o magmalaki dahil kung tutuusin, mamamayan naman ang may dahi­lan kaya nakaluklok ang mga ‘yan sa puwes­to, gayundin na nagmumula rin sa atin ang pondong ginagamit lang nila sa kung anu-ano. Tsk!

Samantala, ayon sa biktima, hindi pa nila nakokontak ang lalaki dahil umano maling nu­mero ang ibinigay nito sa nasabing resort.

Kaya nananawagan tayo sa lahat ng maka­kikilala sa lalaki na ipagbigay-alam agad sa mga awtoridad kung nasaan ito nang sa gayun ay makuha ang kanyang opinyon at kung ma­patutunayang guilty siya, kailangan niya tala­gang pagbayaran ang kanyang ginawang pana­nakit at pagbabanta, gayundin na magsilbi sana itong aral para sa kanya at sa iba na maaaring makaranas ng ganitong sitwasyon.

Palagi nating tatandaan na hindi porke may katungkulan, eh, katatakutan at sasambahin na ito ng mga normal na mamamayan.

Hindi man nangyayari o nakikita sa totoong buhay, pero lahat tayo ay pantay-pantay at wa­lang dapat na nakaaangat o nakalalamang!

Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.