UMANGAT ang laro nina imports Katherine Bell at Stephanie Niemer nang sandali lang na tinilad ng Petron Blaze Spikers ang PLDT Home Fibr, 25-19, 25-9, 25-10 sa Philippine Superliga Grand Prix kahapon sa unang laro sa FilOil Flying V Centre.
Mga tinaguriang best imports ng bansa ngayon, hindi napigilan sina Bell at Niemer mula sa simula hanggang sa tuluyan nang ‘di papormahin ng Petron Blaze Spikers sa easy win ang team sa prestihiyosong women’s club tourney.
Namuno si Bell sa bisa ng 15 puntos at 10 digs habang si Niemer ay may 9 spikes, 3 aces at blocks para sa 14 marka sa unang panalo sa laro na may 1 oras at 26 minuto na nagtagal.
Malaking bagay din ang nagawa ni Mika Reyes sa bisa ng 7 points habang si Aiza Maizo-Pontillas at Remy Palma ay dumagdag ng tig-6 na marka para sa Petron na pakay depensahan ang korona sa torneo. Ang bagong recruit na libero na si Denden Lazaro ay may 10 digs sa Petron debut play niya. “We struggled in the first set maybe because it’s just our first game. The players, especially the imports, were too excited,” ayon kay Petron head coach Shaq Delos Santos. “I told them to relax, take a deep breath and focus. Good thing we were able to recover.”
Mabagal ang naging simula ng Petron at naiiwan pa sa 5-11 sa unang set bago dumikit sa 18-19 hanggang sa tumirada na ito ng pitong diretsong puntos para kunin ang first set. Hindi na napigilan ang defending champion sa sumunod na sets kung saan sina Bell at Niemer ay nag-init nang husto para sa 19- sa 2nd set at 17-5 sa 3rd frame at hindi na lumingon pa. Nag-iisa si Import Grace Lazard na tumatrangko para sa PLDT sa bisa ng 14 puntos kasama ang kapwa import na si Kendra Dahlke, na may 4 na marka. (MC)