GRANDMASTER, IPINAHIYA NI OLAY NAKA-TRONO SA SINGAPORE RAPID

NAUNGUSAN sa meta ng untitled chesser ng Pilipinas na si Edgar Reggie Olay ang isang Grandmaster para mata­gumpay na makaakyat sa trono ng 2019 Hong Bao Rapid Open Chess Tour­nament sa loob ng Thom­son Community Club sa Upper Thomson Road ng Singapore.

Tinapos ni Olay ang torneo sa kartadang anim na puntos mula sa limang panalo at dalawang tabla mula sa pitong salang sa mesa pero hindi ito na­ging sapat para sa korona dahil anim na puntos din ang naging produksyon ng topseed at no. 4 Singapo­rean chesser na si GM Buenaventura Villamayor. Ang rekord sa paligsahan ni Villamayor, dating pam­bato ng Pilipinas at minsan nang naging Asian jr. chess king, ay anim na panalo at isang talo pagkatapos ng pitong rounds.

Nang lapatan na ng unang panuntunan sa tie­break ang standoff nina Olay at Villamayor, idinek­larang may-ari ng cham­pionship trophy at $300 cash ang no. 41 pawn­pusher ng Pilipinas sa tour­nament na isinaayos ng Thomson Community Club at ng Singapore Chess Federation

Kasama sa mga nahu­gutan ng buong puntos ni Olay, may rating na 2321, sina Villamayor (round 6), Malaysian Yuan Sheng Soo (round 1) at ang mga local bets na sina Gerard En Kai Lian (round 3), Feng Sheng Ng (round 4) at Jayden Zhenyong Wong (round 5) saman­talang sa hatian naman ng puntos napunta ang engku­wentro niya kina Hari­haran Ash­win noong pa­ngalawang round at kapwa Pinoy na si Jimson Bitoon noong huling round.

Ang kartada ni Bitoon na 5.5 puntos ay sapat na para masikwat niya ang huling karangalan sa po­dium sa sagupaang nila­hukan ng may 50 ches­sers kabilang na rin ang mga kinatawan ng Brazil, China, England, France, Hongkong, India, New Zealand, Poland, Swit­zerland at USA.