Numero sa senatorial slogan: 11 ni P-Digong, 13 ni Inday Sara at 8 ng LP, may mao-onse, mamalasin at

KA AMBO / BISTADO

NAKATUKLAS ang mga scientist ng bagong specie ng “anay” sa Pilipinas.

Hindi totoo na na­diskubre ang “anay” sa Malacañang!

◘◘◘

MAY kakayahan ang naturang anay na lamu­nin ang buong barko.

Natuklasan ito sa Mabini, Batangas!

◘◘◘

IDINEKLARA ni Pangulong Digong ang “11 senatorial candidates” sa San Jose del Monte City.

Taliwas ito sa “13 senatorial candidates” ng Hugpong ng Pagbabago ni Inday Sara!

◘◘◘

BAKIT kaya kapos ng isang kandidato si P-Digong at sobra naman ng isa si Mayor Sara?

Puwede kayang ‘yung “isang sobra” kay Inday Sara ay ipasak sa “isang kapos” ni P-Digong?

◘◘◘

Kumbaga, sakto ang dalawang grupo ng tiket ng mag-amang Duterte kung matematika ang pag-uusapan.

‘Yun lang, ano bang klase ng “modern math” ang dapat gamitin dito?

◘◘◘

AYON kay Kapitan Marlon Manalo ng Bgy. Malamig sa Mandalu­yong City, nahihirapan na ang estudyanteng maunawaan ang “nume­rong Espanyol” na gina­gamit sa pagbilang ng piso.

Halimbawa, hindi nauunawaan ng millen­nials ang diyes (P10), beinte (P20), treinta (P30), kuwarenta (P40), singkuwenta (P50) at iba pa.

Mas naunawaan nila kapag binanggit ang ten (pesos), twen­ty (pesos), thirty (pesos) etc!

◘◘◘

DAHIL nahihirapan sa Espanyol na pagbi­lang ang millennials, malabo raw na manalo ang “walong (8) kandi­dato ng Liberal Party.

Bakit?

Kasi “otso-dire­cho” ang ginamit nila imbes na “straight eight”!

◘◘◘

BIDA ngayon ang mga numero sa senatorial slogan, 11 ni P-Digong, 13 ni Inday Sara at 8 ng LP.

Magkakaotso-otso ang Liberal Par­ty; mamalasin si Ma­yor Sara at mao-"onse” si P-Digong!

◘◘◘

NAUUSO na rin ang islogan sa kampanya at maraming biro sa diskarte.

Halimbawa, maaa­ring mag-no.1 si “Bong” Go, bakit?

Kasi dalawang pan­tig lang ang kanyang pangalan at madaling tandaan!

◘◘◘

MAAARING mag-no.2 si Ronald dela Rosa kasi mahirap siyang malimutan ng mga kontra sa illegal drugs.

Lalong hindi siya malilimutan ng mga adik at tulak.

Tiyak na papabor sila sa “bato”!

◘◘◘

PINAKASIKAT naman sa mga partylist ang patrol kasi takot ang mga adik sa kanila.

Kapag may sunog at may trahedya, sila ang sumasaklolo.

Lahat ng mga barangay ay may patrol!