Trike driver binaril sa ulo, utas

ITINUMBA ng hindi pa kilalang suspek ang tricycle driver sa harapan ng welding shop sa Parañaque City.

Kinilala ang nasawi na si Ryan Lope y Ebanos, 38, may asawa, tricycle driver, residente ng Bgy. San Dionisio, sanhi ng tama ng bala sa ulo.

Base sa ulat ng Southern Police District (SPD), naganap ang pamamamaril sa harapan ng isang welding shop, alas-8:30 ng umaga.

Sa inisyal na pagsisiyasat nina SPO3 Christopher Blangel at PO3 Gerry Malang, Jr., batay sa testigo na si Jerry, welder, nakatayo ang biktima sa ipinakukumpuning itim na tricycle nang sumulpot ang suspek at binaril sa ulo si Lope na agad nitong ikinasawi.

Tumakas ang suspek sa direksiyon ng Tramo Dos bitbit ang baril na ginamit sa krimen.

Isang basyo ng bala ang narekober ng awtoridad sa pinangyarihan ng insidente.

Patuloy pang inaalam ng mga imbestigador ang motibo sa pamamaril at ang pagkakakilanlan ng salarin.