Programang mangangasiwa sa pangangailangan at problema nina lolo’t lola, oks!
- BULGAR
- Feb 9, 2019
- 2 min read
NOONG iakda ng ating yumaong ama na si dating Senate President Ed Angara ang Senior Citizens Law, ang nasa isip niya ay ang hinaharap ng mga kababayan nating naging bahagi ng ating pag-unlad dahil sa kanilang kontribusyon sa ekonomiya.
Ang mga nakatatanda, isa rin sa mga nagpalakas sa kabuhayan noong kalakasan pa nila, dating taxpayers na malaki ang naibahagi sa pag-unlad.
Pero, sa rami ng kanilang mga pangangailangan sa kanilang “twilight years”, ano ba ang dapat ibalik sa kanila ng gobyerno?
Sa kasalukuyan, mayroon tayong Office of Senior Citizens Affairs. Tanggapan ito na tumutugon sa mga pangangailangan ng mga senior citizen.
Pero, ang problema natin, wala itong central leadership na dapat mangasiwa sa lahat ng pangangailangan at problema ng senior citizens.
Ang kailangan natin, departamentong nakatutok sa kanilang kapakanan.
Sa ating panukalang-batas, ang Senate Bill 2099, ipinanawagan natin ang paglikha sa Council for the Welfare of Senior Citizens o CWSC.
Isasailalim ang pamamalakad nito sa tanggapan ng pangulo. Ito ang departamentong aatasang bumuo ng mga programa para sa promosyon ng kapakanan nina lolo at lola.
Ito rin ang sisiguro na naipagkakaloob sa kanila ang lahat ng kaukulang benepisyo.
Sakaling maisabatas, magsisilbi itong “reward” sa mga senior citizen. Pagkilala ito sa kanilang naiambag sa paglago ng ekonomiya noong kanilang kabataan.
Noong 2010, naitalang mahigit 6 milyon ang mga kababayan nating 60-anyos pataas. Tinatayang bago sumapit ang 2045, aabot na sa mahigit 22 milyon ang mga senior citizen.
Malaking hamon ito sa mga darating na liderato ng bansa sa hinaharap — ang bigyan ng pagkalinga at pagkilala ang milyun-milyong senior citizens na naging kaagapay ng gobyerno sa pagpapayaman ng Pilipinas.
Ngayon pa lang, sana, masimulan na ang malalim na pagpapahalaga sa kanila dahil marami pang henerasyon ang darating at tiyak na mangangailangan din ng suporta.
Comments