Worried kung nakahahawa ang stomach flu

SHANE M. LUDOVICE, M.D / SABI NI DOC

Dear Doc. Shane,

Napansin kong du­marami ang nagkaka­roon ng stomach flu sa aming lugar, hindi lang sa matanda kundi pati na rin sa bata. Dalawa sa mga anak ko ang naka­ranas nito matapos magkasakit ang tita nilang nag-aalaga sa kanila habang nasa trabaho ako. Posible bang nahawahan sila nito? — Joy

Sagot

Ang viral gastroenteritis ay madalas ta­wagin na “stomach flu” subalit, wala talaga itong kaugnayan sa flu o influenza. Ito ay iritasyon ng tiyan at bituka dahil sa impek­siyong sanhi ng mikro­biyo. Karamihan sa mga bata na may viral gastroenteritis ay bumubuti rin pagka­lipas ng ilang araw nang walang paggamot. Ang batang may gastroenteritis ay nanga­nganib ng dehydration kaya dapat silang bantayang maigi.

Narito ang mga sintomas ng viral gastroenteritis:

• Pagtatae (malam­bot at basang dumi) nang higit sa 6 oras

• Pagkakaroon ng dugo sa dumi

• Pagkahilo

• Pagsusuka

• Pulikat

• Matinding pana­nakit ng tiyan

• Pagsakit ng ulo

• Pakiramdam na sobrang pagkauhaw

• Lagnat na aabot sa 100.4°F o higit pa

Paano nakaha­ha­wa ang viral gastroenteritis?

Ang viral gastroenteritis ay nakahahawa. Ang mga mikrobiyo na nagsasanhi ng im­pek­siyon ay madalas na nagpapasalin-salin sa mga tao ng hindi nahu­gasang mga kamay. Makukuha ng mga bata ang mga mikrobiyo mula sa pagkain, kaga­mitan sa pagkain o mga laruan. Ang taong na­impeksi­yon ay maaaring nakahahawa pa rin kahit mabuti na ang kanilang pakiramdam. May mga tao na may impeksiyon subalit, walang sinto­mas.

Narito ang mga paraan para hindi ito lumala:

• Tiyaking magka­roon ng sapat na pahinga.

• Ugaliing painumin ang pasyente ng mara­ming tubig upang hindi ito ma-dehydrate.

• Maaaring painumin ng oral rehydration ang bata tulad ng pedialyte o orasol.

• Iwasang painumin ng mga inuming may mataas na konsumo ng asukal.

• Ugaliing kumain sa wastong oras ng mga masusustansiyang pagkain.

Narito ang mga paraan para mai­wasan ito:

• Ugaliing maghugas ng mga kamay, lalo na pagkatapos gumamit ng banyo, pagsusuot ng diaper sa mga bata at bago maghanda, mag­hain at kumain ng pagkain.

• Panatilihing mali­nis ang lugar kung saan naghahanda ng pagkain.

• Ugaliing labhan ang maruruming damit.

• Gumamit ng mga diaper na waterproof ang panlabas na cover para sa mga sanggol.

• Iwasang madikit ang bata sa mga taong may sakit.