Hirit ng mga informal settler: “Kabuhayan siguraduhin, bago kami i-relocate!”
MATATANDAANG, ilang beses ng nagkaroon ng relokasyon ang pamahalaan para sa mga informal settler kung saan masasabi nating ilan sa mga ito ay hindi naging matagumpay dahil marami pa rin ang pasaway at bumalik sa dati nilang tinitirhan.
Sa ngayon ay mayroong tinatayang 230,000 informal settlers sa buong Metro Manila at base sa census, sa kabuuang bilang ng mga informal settler, nasa 30,000 ang naninirahan sa waterline ng Manila Bay na target na mai-relocate bilang bahagi ng rehabilitasyon.
Gayunman, sinabi ng DENR na ang tsansa nilang bilang ng maire-relocate kada taon ay nasa 10,000, ibig sabihin, aabutin ng dalawang dekada para mai-relocate ang lahat ng informal settlers. Tsk!
Kaya naman tiyak na malaking pangamba ang epekto nito sa mga residente, lalo na at halos lahat sa kanila ay du’n na lumaki at nagkaroon ng kani-kanilang mga pamilya.
‘Yun nga lang, karapatan ng pamahalaan na ilipat sila, lalo na at makahahadlang sila sa pagpapagandang muli ng Manila Bay.
Samantala, kung ire-relocate sila, mainam kung paplanuhin ito nang maayos ng gobyerno nang sa gayun ay hindi na maulit ang mga problemang nangyari noon tulad ng marami sa mga inire-relocate ay bumabalik din naman, gayundin, imbes na tirhan ay pinauupahan.
Dapat ding isaalang-alang ang kabuhayan ng mga ililipat ng bahay dahil kadalasan sa kanila ay ito ang nagiging dahilan kung bakit sila pilit na bumabalik sa dating nilang bahay.
Samantala, sa totoo lang, hindi naman obligasyon ng gobyerno na buhayin ang lahat ng mamamayan sa bansa, pero kung may pagkakataon silang tumulong, eh, matuto tayong magkaroon ng koordinasyon.
‘Ika nga, kung may respeto at disiplina ang bawat isa, wala sigurong magiging problema.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments