GABALLO, PEÑALOSA, AT IBA PANG ASTIG, ABANGERS SA BAKBAKAN

DALAWANG bagong boxing events sa darating na Pebrero 9 at 16 ang itatampok ng libre ang gate pass para sa fans sa Pebrero 9. Bibida sa bakbakan sina Interim WBA World Bantamweight Champion Reymart ‘Assasin’ Gaballo (20-0-0, 17KOs) kontra Japanese prospect Yuya Nakamura (9-2-1, 7Kos) habang si Romero ‘Ruthless’ Duno (18-1-0, 14KOs) at Kuldeep Dhanda (7-1-0, 1KO) ng India ay magbabasagan ng mukha para sa bakanteng World Boxing Association Asian Lightweight Title. Itutuloy din ni Dave ‘Dobermann’ Apolinario (9-0-0, 6KOs) ang kampanya laban kay Ramshane Sarguilla at nakatakdang buksan ang live gate ng 5 p.m. at magsisimula ang bakbakan ng 7:30 pm. sa Midas Hotel and Casino na isasaere ng ESPN5 at sa livestream katuwang ang Sanman Promotions.

Ang mga fighters ay higit nang nakahanda para sa mas exciting na laban para sa fans, ayon kay Sanman Promotions CEO Jim Claude Ma­nangquil kasunod ng pagpuri sa disiplina ni Gaballo: “Gaballo is hardworking… no doubt he is in line to be the Philippines’ next world champion.”

Samantala, matutunghayan naman sa Pebrero 16 sa SM North Skydome ang laban ni Dave ‘Hunter’ Peñalosa (14-0-0, 10KOs) para sa unang sabak kontra Mexico’s Marcos Cardenas (19-6-1, 15KOs) para sa World Boxing Organiza­tion’s Oriental 126-lb belt. Nagbabalik naman si dating world champion Johnriel Casimero (25-4-1, 16KOs) kontra Kenya Yamashita (13-4-0, 10KOs) ng Japan habang si knockout artist Jammes Martin (11-0-0, 10KOs) ay makikipagbasagan ng mukha kay Petchchorhae Kokietgym (17-2-0, 8KOs) ng Thailand at si Carlo Peñalosa (13-1-0, 6Kos) ay laban kay Thai boxer WatanaPhenbaan (18-5-0, 11Kos). Magsisimula ang boksing ng 7 p.m. at isasaere sa ESPN5 ng 9 p.m. Ayon kay TV5 President Chot Reyes, “This is more than the search for the next worldwide boxing icon. “We have different boxing stables around the country producing top talent that can go up against the best in the world. We want the whole country to support our greatest warriors, and with ESPN5 broadcasting the fights live on free TV and digital, we not only give them a global stage — we put the whole world on alert.” (MC)