MABASA, OCSAN AT LABOG, PETMALU SA VEYRA III CUP
NAGSANIB-PUWERSA ang mga untitled chessers na sina Marco Jay Mabasa, Melito Ocsan Jr. at Eric Labog Jr. upang itulak ang 16th seed na koponang tinawag na Napadaan Lang sa kampeonato sa pagsasara ng Alfredo De Veyra III Cup Open Chess Tournament pagkatapos ng pitong rounds sa Alphaland Southgate Mall ng Makati.
Napuwersang ipakita ang tibay ng dibdib sa board 1, hinarap ni Mabasa ang mga titled chessers at nakahugot ng draw kay Grandmaster Darwin Laylo (round 7) at mga panalo kontra kay Woman International Master Bernadette Galas (round 1) at kay National Master John Alcon Datu (round 6).
Bukod dito, nakipaghatian din siya ng puntos kontra sa mga karibal na top boards players kagaya nina Roger Henry Lopez (round 2), Ronald Hermida (round 4) at Aljie Cantonjos (round 5).
Sa kabuuan, nag-ambag si Mabasa ng apat na puntos para sa grupong kumamada ng limang panalo at dalawang tabla.
Walang mantsang rekord (sa pamamagitan ng limang panalo at dalawang draws) ang naging kontribusyon ni Labog sa board 3 samantalang may kabuuang 4.5 puntos ang naisumite ni Ocsan sa board 3 ng kompetisyong umakit ng 46 na koponan.
Pumangalawa sa eksena ang grupo ng The Flash, 9th seed lang sa pre-tournament forecast at binubuo rin ng mga untitled woodpushers, habang ang tropa ni FIDE Master Christoper Castellano (ang kinilala sa bansag na GM Dao-Ron) ang umangkin ng huling upuan sa podium.
Parehong may limang panalo, isang talo at isang tabla ang The Flash at ang GM Dao-Ron.
Comments