Mga taong magpapakalat ng pekeng bomb threat, sampolan!
MAIHAHALINTULAD sa kadena ang sunud-sunod na trahedya ng pagpapasabog na nangyari sa Cathedral sa Jolo, Sulu at sa Mosque sa Zamboanga City kung saan higit itong nakababahala, lalo na at may kumakalat ngayon sa social media na pasasabugin umano ng grupong Abu Sayyaf ang SM Malls na madalas pasyalan ng karamihan sa iba’t ibang panig ng bansa.
Gayunman, agad itong itinanggi ng National Capital Region Police Office (NCRPO) at sinabi sa publiko na huwag mag-panic dahil fake news lamang ito.
Ayon kay NCRPO Chief Director General Guillermo Eleazar, ang nasabing mensahe ay may layon lamang na magdulot ng panic o pagkaalarma sa publiko.
Pinayuhan din niya ang lahat na maging mapagmatyag at alerto nang sa gayun ay makaiwas sa mga insidente na maaaring magdulot ng panganib sa buhay ng lahat.
Samantala, bilang mamamayan, huwag na tayong makidagdag pa sa mga suliraning pinagdaraanan ng bayan dahil sa totoo lang, hindi ito nakabubuti at mas lalo lang tayong nakagugulo sa mga kinauukulan.
Bagama’t, nakababahala ang mga trahedyang ating nababalitaan, huwag tayong mawawalan ng pag-asa na matutuldukan at magkakaroon din ng kaayusan ang lahat, lalo na sa mga lugar na target ng mga terorista.
Sa ngayon, hindi kailangan ng mga awtoridad ng mga impormasyong trip-trip lang!
Kaya ang panawagan natin sa lahat, imbes na magpakalat ng fake news, makipagtulungan na lamang sa gobyerno para maging maayos ang estado ng bansa sa kabila ng sunud-sunod na trahedya na ating kinahaharap.
Para sa inyong opinyon, sumbong, hinaing o nais hinging tulong ito ang pagkakataong marinig ang inyong boses, sumulat lamang sa BOSES ni RYAN SISON at ipadala sa Bulgar Bldg. 538 Quezon Avenue, Quezon City o mag-email sa boses.bulgar@gmail.com.
Comments